uMthunywa
uLangelihle Moyo
ISELE itshotshobele enye imuli yeGokwe elesitolo ngemva kokuhlaselwa yimigulukudu yamadoda amane phakathi kwamabili ngeSonto yabaleka lemali engange-US$9 900, R3 000, umbhobho obulenhlamvu ezingu-28 labomakhalekhukhwini abahlanu.
Kubikwa ngalobobusuku umamangala uLeonard Chari oleminyaka yokuzalwa engu-45 olesitolo esithengisa ukudla, eMasakadza Business Centre eGokwe South wavala esitolo wayalala lemuli yakhe.
Phakathi kobusuku bavuswa ngamadoda amane ayehlome ngamahloka lezigodo. Baqala ukubatshaya labantwana kunye lesisebenzi andubana bathi bafuna imali, labomakhalekhukhwini.
UChari wakhipha imali ayelayo i-US$9 900, R3 000, omakhalekhukhwini abahlanu lombhobho wohlobo lwe-Taurus.
Omakhalekhukhwini laba babiza imali engange-$10 400. Bathe ngemva kokuthatha konke lokhu baphuma bacela ezinyaweni.
Isikhulumi samapholisa eNkabazwe uInspector Emmanuel Mahoko uthe umbhobho watholakala egumeni likamamangala okucatshangelwa ukuthi wawa ngesikhathi imigulukudu le ibaleka.
“Umbhobho owawuthethwe watholakala, kucatshangela ukuthi wawela phansi ngesikhathi bebaleka. Ngithanda ukuxwayisa uzulu ukuthi singabogcina izinkulungwane zezimali ezindlini zethu.
“Sicela ongabe elodletshana olungaphathisa ukuthi kubotshwe imigukudu le azise amapholisa aseduzane laye,” kuphetha uMahoko.
