uMthunywa
KULEMULI edabuka eChipinge egebhe ingcwaba lesihlobo sayo esesileminyaka engu-22 sabekwa eKwekwe njengoba kukholwa ukuba lelongcwaba “belikhuluma”.
Ukugejwa kwengcwaba likamufi lo, okungavelanga ibizo lakhe kube yisimanga emangcwabeni endaweni eyaziwa ngokuthi kuse-Amaveni eKwekwe ngoba kuthiwa ingcwaba leli “belikhuluma” futhi njalo “linyikinyeka”.
Ukugejwa kwengcwaba leli kwenziwe ngabomdeni kamuyi phambi kwezisebenzi zeKhansili yeKwekwe.
Omele imuli le uthe ukugejwa kwengcwa05ba lokhu kwenziwa ngokusemthethweni njalo bacela kube yimfihlo.
“Njengoba libona abeKhansili bakhona lapha amapholisa labemahofisini yalapho okubhaliswa khona izithupha sibabhalele ukuba sithole imvumo yokwenza lokhu.
Imithi yesintu
“Sifuna ukungcwaba isihlobo sethu emangcwabeni akithi eChipinge eManicaland. Sicela ukuba kuhlonitshwe isifiso sethu njengemuli,” kutsho ilunga elimele imuli le.
Kubikwa umufi wafa ngoMfumfu ngomnyaka ka1999, njalo isizatho sokuba imuli yenze isinqumo sokugebha ingcwaba ukuze ayebekwa okwesibili eChipinge asaziwa.
Abasiki bebunda bathi bekuzwakala ilizwi livela engcwabeni leli njalo liphinde libonakale linyikinyeka andubana kwenziwe isinqumo sokugejwa kwalo.
“Sizwe kuthiwa kulengcwaba elikhulumayo umuyi uthi ufuna ukuyabekwa kibo eChipinge njalo belinyikinyeka” kubika omunye obelapho.
Omunye oyisisebenzi esekhansili eye-Amaveni uCharles Juta uthe: “Lokhu kwenziwa ngabemuli, bacelile imvumo yokuba bagebhe isihlobo sabo esasingcwatshelwe lapha ukuze bayesibeka kutsha eManicaland eChipinge. Umufi wadlula emhlabeni ngomnyaka ka1999.”
Ngokwesiko e-Afrika, umuntu ofileyo kukholwa ukuba ulamandla okuhlukumeza abaphilayo, ikakhulukazi labo ababengamphathanga kuhle ngesikhathi esaphila.-Sunday News
