uMthunywa
Ncekwenhle Ncube
EDABENI oluhlasimulisa umzimba, kulomdeni ohlala eNjube khonapha koBulawayo osuphelelwe yizinini ngenxa yemvukuzane ebahlasela inyawo, uMthunywa ukuzwile lokhu.
Loludaba luvele ngemva kokuthi elinye ilunga lomdeni ebeselibangwa lezibi lisizwe ngomunye umphurofethi webandla lamaPositoli ekuqaleni kwayonale inyanga.
Intatheli izwe ukuthi imuli yakoMaseko isitshiywe yizihlobo ezine ezinhlanu ngemva kokuhlaselwa yinyamazana le.
UMnumzana Bongani Maseko olilunga lalumdeni laye obehlaselwe yimvukuzane efanayo ubikele intatheli ukuthi uhlupho lolu luleminyaka emihlanu lwaqalisa.
“Sekuleminyaka engaba mihlanu sitshiywa yizihlobo zibulawa yimvukuzane.
“Umfowethu omdala engimlandelayo wahlaselwa yimvukuzane enyaweni samgijimisela esibhedlela udokotela owayekhona wathi kungcono aqunywe unyawo. Ngemva kokuqunywa unyawo kwathiwa imvukuzane sidlulile sisemlenzeni. Wagula waze wasitshiya.
“Kungakedluli isikhathi uNkosikazi womfowethu laye wangenwa yisibungu esifananayo wahanjiswa esibhedlela wagula okwesikhathi eside. Kwathi ngelanga abamquma ngalo unyawo wahle watshona.
“Nxa umuntu engenwe yimvukuzane akulula. Ubuhlungu bakhona abehli buhlala bunjalo. Kuyabe kuhlaba kungathi kudliwa ithambo ngokwalo,” kuchaza uMnu Maseko.
Iphephandaba libikelwe ukuthi emulini efanayo kulejaha elincane elangenwa yimvukuzane esihlathini kwaze kwakhanya ithambo. Kwehlula ukuthi odokotela bemelaphe waze wafa.
UMnu Maseko uthe waqala esizwa angathi ulunywe yimiyane ntambama, kwavuka ekuseni sekuyisilonda esikhulu esichinca amanzi kuphela.
Uthe bahlaselwa bebabili amalunga omdeni kodwa omunye waphanga watshona.
“Sahlaselwa sibabili yinyamazana efanayo kodwa kwathi ngemva kwesikhatshana umfowethu wafa.
“Ngazama ukudinga usizo endaweni ezinengi kuleli kanye laphetsheya kwamazwe kodwa akuzange kungisize.
Esibhedlela bangipha amaphilisi kodwa kwangacaci.
“Omunye umphurofthi wangifaka omunye umuthi isilonda kodwa kwehlula ngoba isilonda saxhwala ngamandla.
“Ngabhoda indawo ezinengi ngizama ukuthola usizo kodwa kwehlula.
“Okubuhlungu yikuthi bonke abafowethu kanye labantwana abasitshiyayo babethi nxa bengaqunywa unyawo kuthiwe isibungu sakhona sesidlile sesiphezulu ngemva kokuthi isitho somzimba sesikhutshiwe.
“Ngaba lenhlanhla enkulu ngemva kokubonwa ngumama osincedisayo endlini owathi umkakhe umphurofethi Innocent Mhlanga owe12 Apostle uyakwazi ukwelapha imvukuzane. Ngahle ngathi ntambama yakhona ngamcela ngakhulumisana laye.
“Wangithandazela wangifaka isawudo okwamalanga amathathu isilonda saqala ukuvaleka sahle soma qha.
Ngikhuluma nje sengizihambela lobuthongo buyehla kuze kuse,” kutsho uMnu Maseko.
Intatheli kaMthunywa ixhumane loMnumzana Innocent Mhlanga onguye owasiza uMnu Maseko ochaze ukuthi yena kabhadalisi ngoba ethunywe yinkosi.
“Mina ngithunganyelwa yinkosi. Akulambhadalo kodwa ukwelapha imvukuzane ngiyenelisa. Lowo ozwa kusithi ebonge ngalokho alakho ngeke ngimenqabele,” kuphetha uMnu Mhlanga.
