uMthunywa
B Makhalisa
Silokhu silaye uBubbles lezigigaba zempilo yakhe. Impilo kayimhambeli ngendlela ayikhangeleleyo uBubbles.
Sebona lokudela umphefumulo kulicebo elingamnika ukuphefumula komoya.
Zamgabhela izikwelede waze wehluleka khona nje ukubhadala umama owayegcina uKhotso wakhe.
Owesifazane lo laye wabona ukuthi kwasekuphezulu kokuzwisisa lokwenelisa kwakhe wavele wangenela impahla zendlini waziqukula wabangumswenya. Amapholisa athembisa ukumthungatha kodwa phinde.
UBubbles nje wayezibona ehlamukelwe ngabaphansi.
Ngelinye ilanga waqonda uNgonyama ngenkulumo engajayekanga ekhangelelwanga lokuthi ivele emzalini.
Wangena ngenxeba kuNgonyama engathi nje uyazisola njalo uzidla ingaphakathi ngokwehluleka kwakhe ukubhadala izikwelede ayezithatha imihla lamalanga kuNgonyama.
Okulihlazo phezu kwalokho yikuthi wabona kufanele abhadale lezo zikwelede ngoKhotso anikele ingane yakhe eyodwa zwi kuBubbles, yayingekho imizwa yobuhlungu bokuba ngumzali.
Wayekholwa nje ukuthi omunye umuntu wayengamgcinela ingane yakhe kungabi ndaba zalutho.
UNgonyama wakubona kungumqondo ophambane lelanga lowo nje wayetshaya embambatha.
Wazama ukumbonisa langecebo lokuthatha inkosikazi yesibili lapho uBubbles wala wemba phansi.
Wayesala ngelithi wayevele nje edalelwe uBonang qha. Wayengasaziboni engumuntu ongathola inkosikazi evele esezibona engasemuntu walutho.
Wayengasakhathali ngitsho uBubbles lomsebenzi wamphelela ngobutshapha.
Kwala ngitsho lalapho uNgonyama ezama ukumbonisa ukuthi umntwana amhambise le kogogo wakhe eBotswana.
Impendulo wayevele elayo isemlonyeni ethi aluba babemthanda ngabe bahamba laye ngemva kokubeka unina kaKhotso.
Kafikelwa ngitsho layinhliziyo yokuthi ayezehlisa kibo acele bamgcinele uKhotso njengezihlobo zakhe eziseduze.
Akufunayo nje yikuzinikezela kuNgonyama ovele eleyakhe imuli.
Ngumuntu okude lokunanzelela iqiniso lempilo.
Ufunga agomele ukuthi yena ngeke nje aphinde atshaphaze umsebenzi nxa engawuthola sefune kwenela.
Amazwi kaBubbles amnika inhlansi yethemba uNgonyama ukuthi mhlawumbe wayesetshintshile, lokhu kwamenza wahle wamtshela ukuthi kwakulomlungu owayefuna umuntu ozamncedisa ukubhala impahla zakhe ezinengi esitolo kanye lezithengwayo.
UNgonyama wayevele esesazi ukuthi uBubbles lo wayengasakhethi wayesevele ethi ingqe kungumsebenzi.
Kodwa nje ngumuntu owayeselegama elibi wayetshayisa ngovalo njengoba labaqatshi babevele sebexwayelwa kude le ngezenzo zakhe.
