uMthunywa
Silo Ophezulu Stinta kugwalo
NGEVIKI edlulileyo sitshiye uMaMsie edunyelwe ngelensewula engazi nje lokuthi abambe kuphi ayekele kuphi. Lasa elingaliyo uMaMsie elokhu ebheke ngayizolo. Wayezibuza imibuzo engena kuphendulwa ngubani. Wayeswela khona nje lokuthi wayezaqonda kusiphi isihlobo.
Ngaleyo mini kwathi dlwe kuye, kwakukhona kukhanya kucaca kuye ukuthi impilo iyaguquka wakhumbula ukuthi ngensuku zakhe impilo iphethwe nguye ubengasazi isihlobo, izihlobo lezi wayeziphatha ngesandla senxele enganakile nje lokuthi bangabantu loba bazinyamazana. Wazibhoda zonke ngelihlo lenhliziyo kazange aphume laye owayengamgcina wayeze ambone loyise omncane emhleka usulu.
UNkonkoni idombo likaNgonyama wavuka walubhekisa koNgonyama njengesivumelwano esasenziwe sokuthi aqhube uMaMsie esiya kwabo. Ekufikeni kwakhe uthola uMamsie engekho lapha ekhaya engaziwa lokuthi wayebhekise amabombo kuliphi ilizwe. Walinda ngokuzimisela uNkonkoni kodwa ke kazange avele alugxobe uMamsie kwakungani nje wayethe tshoko ekhusini amehlo ethe nhlo egumeni ukuze ambone uNkonkoni lapho esephuma.
Kwaba nje yisimanga ukuthi uNgonyama wathi evela emsebenzini wathola uMamsie ezihlalele esofeni ethule zwi, kungathi akukho lutho olonakeleyo. Njengomuntu wamaqhinga lawo wonke amasu umuntu angawacabanga wayesevele eselungise kudala uMamsie, wahle nje wabanguye oqala ukumtshonisa uNgonyama njengenina elilomthetho uNgonyama wamthapha ngamehlo kazange alokothe nje ukumphendula waziqondela ekameleni lakhe.
Wayezizwa nje uNgonyama ukuthi ulaka lwase luvele selusesilakalakeni. Sinanzelela isifundo esikhulu lapha kuNgonyama ukuthi abantu bangaze bavumela ulaka ngoba lungaletha izilandelamuva ezingancomekiyo.
UNgonyama simbone enanzelela ukuthi lokhu kwakungahlukumeza abantwana ngoba kwakungavuka umsindo phambi kwamehlo abo kanti isenzo esifana lalesi siyabahlukumeza abantwana. Okunye njalo kwakungambizela amehlo abantu evele yena engumuntu olesithunzi ohloniphekayo umsindo wawumkhupha ubuntu esigabeni kanye lasemsebenzini.
UNgonyama wethula isibonelo sempilo ukuthi ekuhlaleni lapha laphakathi kwemizi zikhona izilingo ezifana loMaMsie kodwa ke ngezinye izikhathi kuyadingeka umuntu ajikelwa intambo azibophele yedwa. Ngezenzo zikaMaMsie ezesimilo esixegayo ngabe umuzi kaNgonyama wawuhlala kuyizibhakela kodwa lokhu asikuboni uyathula nje loba nje yena uMaMsie esuke azibone yena esengohlakaniphileyo engazi ukuthi kukhona imini eyisithutha.
