uMthunywa
B Makhalisa
Abadala bathi vele ikhula lamanono ayo, kungakapheli lenyanga ezintathu nje uBubbles wayesephumile esihitshelweni sobuntu.
Waqala ukukhupha ezinye impahla ngasese ethengisa ukuze enelise ukubheja amabhiza. Elokufa vele kalitsheli kwaba yikuphela komsebenzi. Umlungu ayemsebenzela wayefuna inhlawulo yempahla abanjwa elazo waswela yona nje indibilitshi uBubbles. Okokucina imali yayivele ingekho kuye ngitsho lakancane. Wabuya wamephula njalo uNgonyama kuloludaka ayesezibhixe watshona kulo uBubbles. Loba wayethi impilo yenkinga nje, uBubbles wayevele esehluleka yena yedwa ukuhlela impilo, eselomkhuba wokubelethwa emhlane wabanye yikho lokutshiya uKhotso ehofisini kaNgonyama engekho kungazange kumthathele isikhathi loba nje ukumtshayisa ngovalo.
Singena isahluko sesihlanu. Kwasekuhambe izinsuku ezithile uKhotso ehlala lapha ekhaya koNgonyama.
UNgonyama laye wayesephumile kusigaba sokuzidla ingqondo ngezenzo zomngane wakhe lo onguBubbles.
Wayephatheke kubi ngamadabudabu ayegqokwe nguKhotso. Wazehlisa kuMaMsie ecela ukuthi bayemdobhela okokwembatha angabi lihlazo phakathi kwabanye abantwana. Lapho-ke wayeseyinyathele emsileni okaNgonyama.
Wavungama uMaMsie ngelithi ukuze abelapha ekhaya kwakuvele kutheni. UNgonyama laye wabuza ngokwazi isimilo somkakhe ukuthi ngabe wayesezimisele na ukuzwa ngokufika kuka Khotso emzini wabo njengoba wayengafuni lutho nje ngaye.
Wagqabhaza awathandayo lawazondayo uMaMsie ngalelolanga. Konke nje okwakhe uMaMsie akumvezi njengomuntu okhathalela impilo kumbe olombono obanzi ozicabangela okwengane enuka uchago emakhaleni.
Abakhe abantwana babecicima ngemihlobohlobo yempahla ezinye zibekiwe emakhabothini zingelamsebenzi.
Kazange afune khona nje ukuthi kuphiwe uKhotso esisodwa nje lokhu. Umoya wakhe omubi wawungadeli kuye.
Wayengamzweli ngitsho lomkakhe lo owayesebunzimeni.
Ngokuthula uNgonyama wasukuma wadlula ngasemkulweni ebiza uKhotso owayezixoxela logogola walapha ekhaya.
Ugogola lo wayebathanda abantwana okuyikho okwenza loKhotso azizwe ekhululekile ekhaya nxa ugogola ekhona.
UMaMsie wayekufuna ukuya edolobheni njengomuntu othanda ukubonakala. Isikhubo nje kwasekunguKhotso, ukwala kwakhe kwakuyindlela yokutshengisa uNgonyama ukuthi wayengafuni lutho olumhlanganisa loKhotso lo.
Bathe nje sebephumile uNgonyama loKhotso uMaMsie wacabanga izibozi zakhe wadobha ucingo watshayela uJozi.
UJozi lo wayemtshaya ngaphakathi okwamagama. Wayesithi lapho ekhuluma laye ezwe nje igazi lakhe ligijima umzimba ugcwala injabulo. Kodwa konke lokhu wayengakuzwa ngomyeni wakhe.
