uMthunywa
Ngeviki edluleyo sinanzelele ukuthi abantwana bakaNgonyama sebexoxisana loKhotso sebelenhlasane yokwamukela njengomunye wabo loba nje uMaMsie wayengahambelani lakho. UMaMsie wazama ngelinye lamalanga ukuthi abe ngowesifazana ohlala phansi lomkakhe babonisane ngezomuzi wabo.
Njengenjayelo uMaMsie wayelenhloso ecatshileyo ngesenzo lesi. Lapha-ke wayekhalaza ngokuthi imuli yayisikhulile okwedlula isinqumo abasithatha ndawonye ngokuhlela imuli yabo. Kikho konke umuntu owayephambanisa lapha kuhlelo lwemuli nguKhotso.
Injongo yakhe enkulu kwakuyikuhambisa uKhotso eTembiso, indawo egcina intandane. Aze atsho lokuthi akulalutho abazalwenzelwa nguKhotso ngaphandle kokubadlalisela imali.
UNgonyama wayengavumelani lombono kaMaMsie, wayekhalaza ngokuthi abantwana abahlala eTembiso labo bayadinga umusa lokufudumala kwekhaya. Wayezizwa esiba lesazela esimsindayo nxa engahambisa uKhotso kuleyondawo. Wayesithi angacabanga ilanga uBubbles amsiza ngalo kungesuye ngabe waqandwa yimamba wahle waqanda mo, okokuthi ngabe laye uMaMsie lowo wayengeke athole ubutofotofo lobo ayephila kubo. Wazehlisa uNgonyama ngelithi “bengicela simgcine mama,” kukhasi 43. UMaMsie waqhubeka ngokumgcona uKhotso ngelithi wayesekhulumisana labantu bonke abaphansi okwakusenza adonsele uSusie kulabo bantu okuthiwa ngabaphansi.
Konke lokhu uNgonyama wayengahambelani lakho. Yena wayefuna abantwana bahlale ngomusa labanye abantwana bazehlise kwabanye abantwana, hatshi ukuziphakamisa. UNgonyama wayezama ukufaka ubuntu ebantwaneni bakhe.
Wayezama ukubabonisa abantwana bakhe ukuthi abantu abadubekayo akutsho ukuthi sebengabantu abaxhwalileyo, labo bayadinga ukuhlalisana labanye abantu, babendawonye baqaphele nje ukukhuluma inhlamba lokudelela abantu abadala.
Akubanga nsuku ezingaki uDavie wabonakala esengohleka yedwa sekungathi ngumuntu obalekelwa zingqondo.
UNgonyama ngokujayela izixhwali esikolo wahle wazi ukuthi kukhona okutshaya amanzi lapha. Wababuza abantwana kwacaca uSusie engathi kukhona ayelakho emehlweni akhe. UKhotso isazela sakhe sahle samlahla loba nje wayelandula, isimilo sakhe sokwethembeka sahle sabika ukuthi kukhona okungahambi kuhle. Kunengi okungabambisa kanye lokuveza okuthile emuntwini kuphela nje ngesimilo.
Lapho uMaMsie wahle wathola ithuba lokukhwela azehlele phezu kukaKhotso. Yena wahle wabona uKhotso kunguye onike uDavie okungaqondanga okuyikho okwakumenza aziphathe ngendlela engajayelekanga. UMaMsie wabalisela uNgonyama ubusuku bonke ukuthi uKhotso nguye lo owayeseqale imikhuba lapha ekhaya.
