uMthunywa
Silo Ophezulu Stinta
SIQHUBEKA layo indaba kaMaMsie ezama ngamandla wonke ukuthi abuyisele isikhundla sakhe sobunina lapha ekhaya efisa njalo lokuthi uNgonyama emnike leyana nhlonipho kanye laloluyana thando ayemnike lona. Kodwa-ke impilo yayingathi isikwenqabela lokho. Ingulube yingulube kubanzima ukuthi iphile ingazange nje izininde ngodaka.
Wayenjalo-ke uMaMsie, wayehlala hlala ayikhumbule impilo yakhe yobunandi ayeyiphila okuyiyo njalo emfake kulelixhaphozi. Siqhuba isahluko setshumi lanye.
Kwathi ngelinye ilanga, ngemva kokuhlelwa kwezinqumo lapha emzini kaNgonyama, uMaMsie ezihambela nje edolobheni ngqwa loJoza. Lelolanga wazenza yena ongamboniyo baphambana nje. UJozandini lo wayevele nje eyinswelaboya ebantwini besifazane okwakumkholisisa nje yikuthi nje abone amantombazana kanye lamakhosikazi abantu jikelele bebhuza phezu kwakhe njengempukane, lokho yena kwakumenza abe yindoda ekude nje lokuhlakazeka kwesimilo sakhe.
Lalamuhla amadoda afana loJoza ayaphila empilweni njalo impawu zabo zokuba zinswelaboya zicacile kubani lobani, kuyisifundo esikhulu kuwo wonke amantombazana lesifazane ukuthi kuyasiza ukubaxwaya abantu abanjengoJoza ngoba yebo bangabe beletha yonke inkoliso kodwa ekucineni labobantu inhloso yabo yikuhlakaza inhliziyo zabanengi. Abantu abanjalo ke balemijibila ebukhali njalo abayithiya iqaphe nta njengoba uJoza ekwenza nje.
UJoza wezwa engasuthisekanga ngokuthi uMaMsie amane aphambane laye nje kanjalo. Wezwa eyikhumbula imali ayemudla yona, wayengamkhumbuli ngothando hatshi kodwa wayemkhumbula ngemali yakhe qha. Ngakho-ke wakumisa sobala ukuthi uzamgubha, ayithiye inhlanzi ize idle. Leyo mini uMaMsie yena wayekubeke sobala ukuthi wayengasoke loba sekutheni abuphinde ububhanxa bokuwela ezandleni zikaJoza. Loba nje wayelesifiso sokuchaza uJoza ngahlabayo wabuya njalo wazikhuza ngelithi abantu babengambona ngelinye ilihlo bayigijimisele kuNgonyama.
Umuntu uphuma nzima endleleni yakhe akukhathalekile izeluleko lakho konke adlula kikho. UMaMsie esebone uNgonyama engancibiliki wathi kungcono ake aphume atshontshele ayezinathela kwezinye zetshabhini zakhe zobunandi elokitshini lePhelandaba. Wayekwazi mhlophe ukuthi uGogola wayengeke ayithi vu lapha kuNgonyama.
Wayezilungele uGogola engathandi ukuxokozela endabeni zabantu.
UMaMsie wayelande ezinengi kuleyotshabhini. Lapho ayexoxa khona lomngane wakhe uMaNdlela owayehlayaza ngelithi wayecatshe ngokuzehlisa umzimba na. Wakulandula konke lokho uMaMsie. Wayingenisa inkulumo yakhe yaze yaba semfolweni iqonde nta. Into ayeyifuna kuMaNdlela lusizo nje lwempande ayekhala ngokuthi yayimqondisela uNgonyama njengoba nje wayengasamnaki lokumnaka. Lokho kwakuvela enhlizweni yakhe kuphelele uMaMsie njengoba loMaNdlela wayesenanzelela ukuthi uMaMsie lo wayengasenguye owansuku zonke.
Kukhulu ayekugiga ekhanda lakhe.
