uMthunywa
B Makhalisa
UKhotso sehlala lapha koNgonyama, sengumtwana walapha ekhaya. Ziyatshiyana ingxoxo phakathi kwalaba bantwana.
USusie wayengaboni isidingo sokuthi uKhotso ancedise uGogola ukugezisa imiganu. Wayefundiswe ngunina ukuthi uGogola uyahola ngakho kwakufanele asebenzele imali yakhe. UKhotso yena esazi ukuthi kuyinto enhle ukuncedisa abantu abadala njalo yilokho okwakuthandwa yiNkosi.
Indlela uDavie loSusie abakhuluma ngayo ngabantu abadala kubo, uGogola loMadala kayibavezi njengabantwana abahloniphayo. Abalandaba lokuthi ngabantu abadala abakhangelane labo okunye njalo kuyimfundiso kanina.
Sinanzelela lapho uSusie esefunde ukulandela uKhotso owayethi angaqeda ukudla abonge, uDavie uyambuza ke ngelithi manje onanny labo bayabe bebongwani, ngabe akuthengwanga ngubaba ubezakupheka kuvela ngaphi?
(Kukhasi 88). Ngamazwi aphuma emntwaneni ewaqondise emuntwini omdala. Lokhu kuveza isimilo sikaDavie sokungabi lenhlonipho, isimilo esixegayo esingaboni isidingo sokubonga. UDavie njalo ungumntwana ongesabi iNkosi ngendlela akhuluma ngayo esithi yena izinto ezenzakalayo zenzakala ngemvelo azikho emandleni eNkosi.
UNgonyama yena ke wayelokhu ezama ukuthintana labo yisemkhulu bakaKhotso abazise ukuthi umntwana ulaye.
Kwaze kwathi ngemva kwesikhathi walithola ikheli waselobela ukhulu kaKhotso. Impendulo ayithola kuyisemkhulu kaKhotso yayingelazwelo wayengazimiselanga ngitsho ukusiza uNgonyama. Wamazisa ukuthi yena elakhe igazi walingcwaba, phezu kokuthi umntanakhe wavela wendela kuBubbles engathandi wenza okwenkani. Wayelokhu ebambe leso sikhwili kwala lalapho uBonang esebhubhile.
Uyisemkhulu kaKhotso uNthele wayelenhliziyo elukhuni okwamagama. Loba nje ngezinye indlela sithola isifundo esimqoka ukuthi kuqakathekile ukulalela ilizwi lomzali izikhathi zonke ngoba kusasa kubalesidingeko soncedo lomzali kodwa ke nxa ubudlelwano sebabhidlizeka kuba lobunzima empilweni.
UNgonyama wayifunda kanengi nengi incwadi yakhe ethi mhlawumbe uzayizwisisa ngenye indlela kodwa phinde yayilokhu imtshela okufananayo kungela nguquko. Lapho uNgonyama wakubona ukuthi impilo yinkinga ngeqiniso kambe ukhulu lo wayengelazwelo ngomzukulu wakhe.
Wayesezibuza langogogo wakhe ukuthi pho yena yini ndaba wayengezi azothatha umntwana njengoba wayezwe ukuthi wayemthanda okwamagama. Konke lokhu wayekucabanga esemnyameni engazi ukuthi lalowo gogo wayesewaziphumulela engasekho emhlabeni.
UNthele laye wayevele nje ephakathi kobunzima bemuli ayesebhekane layo eyedwa. Isondlo sasimkhama konke lokhu kugcwalisa isihloko sogwalo.
