uMthunywa
Mthokozisi Dube
ZIMBI indaba eNkayi nanko phela abebandla le United Congregational Church of Southern Africa (UCCSA) basola isenzo sekhansili yakulindawo esokwekela izikolo zakulo umkhono zisifa, UMthunywa ongelampontshi uyakufakaza lokhu.
Ibandla leli lifuna ukuhluthuna zonke izikolo ezingaphansi kwekhansili ngoba kungela ngqubekelaphambili ebonakalayo kulezizikolo njalo kubikwa vele izikolo lezi zazingezebandla.
I-UCCSA ibikele UMthunywa kuliviki ukuba ifuna ukuthatha zonke izikolo ezingaphansi kwekhansili zibengezayo njalo izithuthukise. Okwamanje ibandla leli lilezikolo ezingaba ngamatshumi amabili lambili njalo likhangelele ukuthi lihluthune ezinye izikolo ezisemangweni weMphakama njengoba kumgceke ukuthi ziyatshabalala phambi kwamehlo abantu.
“NjengeUCCSA sithi sifuna izikolo zethu ngoba akukho lento eyodwa ebambekayo esingathi yakhiwe ngemva kokungena kwekhansili ezikolweni zethu,” kubika uAmos Dube olilunga lenkonzo le.
UDube ubike ukuba izikolo ezinengi zibuyela muva kulindawo ngoba abaphathi bazithatha bazenza imizi yabo.
Uqhubekele phambili ebika njalo ukuthi bafuna ukuthi baziholisele lababalisi abayabe befundisa ezikolo lezi okuzenza kube lemfundo engcono ezikolo
“Khathesi izikolo lezi zithole usekelo lwezingwalo kodwa thina abanikazi bezikolo asikwazi ngoba abaphathi laba bayakufihla. Kwazi bani ukuba kubuye ingwalo ezingaki? Angithi kumele basazise ukuze siyebonga,” kubika uDube.
Esinye sezikolo okukhulunywa ngazo yiZinyangeni Secondary njalo kulesisikolo inkonzo le isola ukwakhiwa kwekilinika endaweni yabo. Kuthiwa likilinika yakhiwe emngceleni wabo.
Ekhuluma loMthunywa omele umqondisi wezemfundo esabelweni seMatabeleland North, uMnumzana Jabulani Mpofu, ubike ukuba izikolo zazingezabo njalo angeke aziqambe ukuba zingaki kodwa akwaziyo yikuthi akwalelwa ukuthi inkonzo izithathe izikolo lezi izithuthukise.
“Akwalelwa ukuthi izikolo zithuthukiswe kodwa okokuthi sebefuna ukuziholisela ababalisi lokho angiboni ukuthi kungavunyelwa,” kubika uMnu Mpofu.
UMnu Mpofu ubike ukuba ezinye izikolo ezikulindawo zingaphansi kwamabandla abalisa leSabatha.
