uMthunywa
Nomthandazo Ndlovu loThando Dube
KUNDIZE amaqhiye lamazambiya koKhothama oseduzane leRoss Camp amanye amanina sedumelane kwaba luthuli ebanga indawo yokuthengisela.
Lesi sigenqugenqu senzakale ngoMvulo wayonale iviki lapho uNkosazana Knowledge Mathema abhuqane khona loNkosikazi Tinevimbo Moyo kubangwa ukuthi kungani uNkszn Mathema ethengisela endaweni kaNkkz Moyo.
Likhuluma lentatheli zikaMthunywa elinye inina elithande ukwaziwa ngokuthi MaNare nje kuphela lithe abakubone lapho kunzima.
“Kubencane indawo lapha ngesikhatshana nje kuze kwasiza abantu abaphange balamula ngoba bebezacina belimazana, imbangela yokulwa kwabo yikuthi uNkkz Moyo uthole uNkszn Mathema sefake impahla zakhe endaweni yakhe.
“Mina angazi ukuthi sokuhamba njani lapha ngoba kubuye umuntu esithi ulamabizo abantu osokumele bathengisele lapha, abanye bethu bebengabhalwanga lapho manje bebengasela ndawo zokuthengisela kwacina sokungumsindo omkhulu,” kutsho uMaNare.
UNkkz Moyo ebuzwa ngodaba lolu uthe yena umangele sethola uMathema sethengisela endaweni yakhe yena ekwazi ukuthi ngeyakhe.
“Mina ngimangele ngibuya emsebenzini sengithola umuntu sethengisela endaweni yami, ngithe ngisithi asuke yena wathi yindawo yakhe ayinikiweyo laye labo abangabizwanga abaselandawo zokuthengisela.
“Lokhu kungicaphulile kakhulu ngoba mina bengingazi ukuthi abantu sebephiwa izindawo kutsha, ngicabange ukuthi uyangidelela ngoba sengilesikhathi ngisebenzela lapha,” kuchaza uNkkz.
UNkszn Mathema yena uthe banikwe indawo ezintsha zokuthengisela, umangele uNkkz Moyo semhlasela esithi udingani endaweni yakhe.
“Mina angazi ukuthi uMaMoyo kungani efike ngomsindo kimi ngoba sinikwe izindawo ezintsha zokuthengisela, bengicabanga ukuthi laye unikiwe eyakhe, ngimangele sesilwa lami,” kutsho uNkszn Mathema.
Ebuzwa ngodaba lolu uMnumzana Chikwama onguye obebuza amabizo alabo abaphiwe indawo zokuthengisela ezintsha uthe wonke umuntu uzathola indawo, abantu akumelanga balwe.
“Wonke umuntu obhalisileyo uzathola indawo yakhe lapha, akumelanga abantu balwe bebanga indawo. Kuzalunga, ngizakulungisa lokho,” kutsho uMnu Chikwama.
Ebuzwa ukuthi uyisisebenzi sekhansili yini uMnu Chikwama uthe hatshi.
Imizamo yokukhuluma lesikhulumi seKhansili uNkosikazi Nesisa Mpofu yehlule ngoba ubengekho ewofisini ngesikhathi intatheli idinga ukukhuluma laye.
