uMthunywa
KUQHAMUKE impi esikolo seSprings Secondary eKurhuleni lapho abafundi abagwazane ngezingqamu lezigelo ngoLwesihlanu kuviki ephelileyo okucine kubangela ukuthi abafundi abathathu balaliswe esibhedlela.
Abafundi laba bagwazane egcekeni lesikolo ngesikhathi sokuphumula emini.
Loba bekungasikho kwakuqala ingqamu lezigelo kusetshenziswa ekulweni esikolo lesi, lokhu okwakhathesi kubangele abafundi abathathu ukuthi bacine belaliswa esibhedlela.
Kubikwa abafundi abavela emikhukhwini eseduze labavela elokitshini sebelesikhathi bexabana esikolo lesi seKurhuleni. Omunye umfundi wesikolo lesi osewaqeda esikolo lesi uthe ukulwa ngezingqamu lokhu kwaqala ngomnyaka ophelileyo. Uthi impi le yaqala phandle kwesikolo yacina isingena lesikolo.
“Bengisesikolo ngomnyaka ophelileyo, bebegwazana okwesabisayo.
“Ababalisi abenelisi ukulamula kungavele kuqale.”
Intatheli zilevidiyo yomunye umfundi ehlasela omunye emgwaza.
Ngemva kwemizuzwana nje, omunye umfundi uyafika baqale ukugijimisana ngezingqamu.
Isikhulumi samapholisa seSprings uKaputeni Johannes Ramphora uthe basaphenyisisa ukuthi kungabe kuyini okubangele ukulwa lokhu.
“Udaba lolu solufikile kithi, amacala amabili okulwa avuliwe. Kuliqiniso ukuthi kulabafundi abathathu abalimalayo bahanjiswa esibhedlela ukuya kwelatshwa,” kuphetha uKaputeni Ramphora. — Ubulembu