uMthunywa
Ethel Ncube
IQOLO lenkukhu libangele ukuthi kuqhamuke impi phakathi kukababa lomama bomunye umuzi eNtalale eGwanda, kwaliwa kwaba luthuli kwaze kwalamula omakhelwane.
Indaba le yenzakale emavikini asanda kudlula lapho uNkosazana Sandisiwe Nare egoqele umkakhe uMnumzana Jordan Moyo izibhakela ngemva kokuba emtshaye ngomganu wamthela ngamanzi okugeza izandla ekhala ngokuthi kungani engamphakululelanga iqolo lenkukhu.
UMthunywa uxhumane lomunye olilunga lemuli uNkosazana Tsepang Sibanda obike ukuba indaba le sebezamile ukuyilungisa kodwa mhlalokhu kwakungamanga kuhle.
“Umnewethu wafika edle umagwebu bathi bemnika ukudla wakhonona ngokuthi iqolo lalingekho emgwanwini wakhe, wakhwaza qede wajikijela umkakhe ngomganu wamthela langamanzi okugeza izandla okwenza unkosikazi wakhe wathukuthela.
“Umalukazana wasifumbatha isibhakela wasithela kumkakhe kwaba luthuli laba ababili bebhuqana ngenxa yogazana.
“UMoyo kubikwa wayephethe ethi emzini wakhe nguye yedwa okumele aphakulelwe iqolo nxa kudliwa inkukhu kukanti kabuzanga elangeni, umkakhe lokhu kwamcaphula wameqela wayiphosa inqindi njengenqindi kwaze kwacina kulamula omakhelwane.
“Kithi bakhuluma sibili ukuthi behluleke ukuzwana ngendaba yeqolo lenkukhu lomalukazana laye wathi ucatshulwe yikuthi athelwe ngamanzi kulokuthi bakhulume ngomlomo bazwane,” kutsho uNkszn Sibanda.
Ekhuluma lentatheli uNkszn Nare owayesilwa lendoda kubangwa inyama uvumile ukuba lokho wakwenza.
“Mina isibhakela ngasiphosa ngoba sengizondile njalo ngizama ukuzivikela ngoba wayesengitshaya ngomganu.
“Okwakubangwa liqolo lenkukhu acina engalidlanga esengicaphule ngokungithela ngamanzi lokungitshaya,” kubika uNkszn Nare.
Ekhuluma lephephandaba likazulu uMmumzana Jordan Moyo ubike ukuba indaba le ngeyomdeni, kayifuni abanye.
“Indaba oyibuzayo ngeyomdeni ngeke ngikhulume lutho kuwe,” kuphetha uMnu Moyo.
