uMthunywa
Ethel Ncube
KULEMULI yeSt Paul’s, eLupane esele ikhakhamele njalo idanile ngemva kokuba kuqungwe imbiza yesitshebo yonke ngomthambiso.
Isiga lesi senzakale emavikini amabili adluleyo lapho uMnumzana Gillet Moyo ethambisele phakathi kwe-calabash wathela phakathi kwembiza ebiseziko ilenyama phakathi, okubangele ukuthi etshaywe kabuhlungu.
UMthunywa uxhumane lomunye welunga lemuli elalikhona kusenzakala lokhu uMnumzana Joel Moyo ochaze ukuba loludaba lwabephula inhliziyo.
“Utshwala bulamanyala sibili, thina sihlezi ntambama silinde imbiza ixhwatha ubaba wathutsha egodle okuligabha kanti kulomchemo phakathi nango equnga isitshebo. Umama uthe uyephula imbiza inyama isigcwele umthambiso.
Akwenzayo kwasidabula inhliziyo ukuthi isitshebo sihlupha kangaka ekhaya yena asiphoxe ngomthambiso kumbe wayesikhawulisa,” kubika uMnu Moyo.
Uphinde waveza ukuba ngesikhathi sokutholakele kwavuka omunye umsindo onzima kakhulu.
“Omunye umnewethu wathi sokunjalo wadobha isitina ngokuzonda ezama ukuba ajikijele ubaba kwabayinhlanhla wamkhutha ecatshulwe yikuthi sasesikhuthe ukudla inyama ngenxa yomthambiso kamdala,” kubika uMnu Moyo.
Ekhuluma loMthunywa uNkosazana Celiwe Sibanda uchaze ukuba isenzo lesi sabaqeda amandla.
“Asizange sibelenkani ukuthi umuntu shuwa engekela kuphekwe sokuzavuthwa asiphoxe ngomthambiso. Lo ngumona, akula okunye okudlula lapha, silale ngombhida ngenxa yomuntu ezenzisa kuphela kwasilela omthambisayo ngempama,” kubika uNkosazana Sibanda.
UMthunywa ukhulumisane loMnumzana Gillet Moyo onguye owaqunga isitshebo ovumileyo ukuba wakwenza.
“Mina ngangivele ngiphandlwe ngamabele nginganzeleli ukuba sengisona isitshebo sabanikazi kodwa-ke sesakhulumisana kwedlula,” kuphetha uMnu Moyo.
