uMthunywa
Cornelius Luphahla loEthel Ncube
ZIMADOLO nzima njalo lokhu zinkemile izakhamizi zeGwitshi, eNkayi kulandela ukukhitshwa kwenyoka okubikwa ibikhotha enye indoda esithweni sangasese ngenhloso yokuselapha imvukuzane.
Imbedumehlwana le ivele emavikini amabili adluleyo lapho izakhamizi zakule indawo ebezimeme khona abomoya ukuba bazonhlanza isigaba lesi ebesesigcwele izigigaba.
UMnumzana Freddy Sibanda utholakale elenyoka ebihlala esihlahleni esiseduze lomuzi wakhe njalo ibilala labomalukazana bakhe iphinde iyekhotha isilonda sakhe esisesithweni sangasese esesileminyaka eminengi singapholi.
UMthunywa wethekelele kulindawo lapho axhumane lesakhamuzi uMnumzana Sifelani Dube ochaze ukuthi lokhe wahlala kule indawo uyaqala ukubona inyoka eyenza izimanga ezinje.
“Lokhe ngakhotha udengezi lwedubha ngangiqala ukubona umhambaphansi ofana lowakhitshelwa uSibanda. Inyoka le yayinkulu okwesabekayo iphosa ifane lemamba kodwa yona ingathi iyibubende. Abaphurofethi bagijima baqonda emfuleni uTshangane sathi silandela sathola omunye wabo eyibambe ngezandla intamo iphezulu kwesihlahla yona isimthandele intamo kanye lomzimba wonke.
“Kuthe kunjalo bambuza ukuthi inyoka ngekabani wala wathi kayazi. Umphurofethi lo wathi kavume nxa ingeyakhe ngoba inyoka le izaze imbulale ngokumkhama njengoba yayimthandele lentamo. Ngemva kwalokho uSibanda wavuma ukuthi ngeyakhe inyoka yahle yamekela umphurofethi yatshiswa,” kulandisa uMnu Dube.
Iphephandaba likazulu lizwe njalo ukuba inyoka le ebihlala esihlahleni ibisehla ebusuku iqale iyekhotha isilonda sikaSibanda andubana iyelala labomalukazana bona bengakwazi.
Ekhuluma loMthunywa uNkosazana Nomqhele Ndlovu uveze ukuthi uyakholwa ukuba inyoka le ngekaSibanda njalo yayilala labo ngoba bebehlala begula bonke.
“Mina ngokubona kwami kuluqiniso ukuthi inyoka le ngekaSibanda ngoba omalukazana bakhe abane bebehlala bekhala ngomkhuhlane wesinye okutshengisa ukuthi bekungenxa yokulala lenyoka le. Ngikhuluma nje lokhu yakhitshwayo inyoka le angizake ngibezwe bethi baya esibhedlela bayagula,” kutsho uNkszn Moyo.
Iphephandaba likazulu likhulumisane lalowo ocatshangelwa ukuba ngumnikazi wenyoka uMnu Sibanda wavuma ukuba inyoka yakhitshwa kuye.
“Inyoka yaphuma sibili kodwa yayingekho emzini wami yayiseduze lensimu yami eseceleni komfula uTshangani.
Abaphurofethi laba banginathisa amanzi abo ngahle ngaba lesiyezi ngangasaboni lutho. Ngemva kwalokho bathi inyoka le ihlala kimi ngakho sibalekile yayacatsha ensimini yami basebegijima besiya khona. Abanye balandela bengithwele ngingasenelisi lutho.
“Sithe sifika lapho okwakulenyoka khona phezulu kwesihlahla bathi inyoka le ibingikhotha isilonda engilaso ngasese esesileminyaka edlula 20 singapholi. Babuya bathi yayithi ingangikhotha isilonda lesi sibengcono, baphinde bathi inyoka le yayilala labomalukazana bami njalo yiyo eyakhama umkami yambulala ngo 2000.
“Ngemva kwalokho bathi kangivume ukuthi inyoka le ngeyami ngoba yayisithandele umphorofethi intamo. Ngithe ngibona ukuthi ingaphetha imbulala ngavuma ukuthi ngeyami. Isimanga yikuthi enyangeni eziyisithupha ezidlulileyo kwabuya abanye abaphurofethi bathi inyoka le bayithiyile izakufa kodwa khathesi laba bathi iyaphila.
“Ngikhuluma nje sasingasezwani labantwabami kungakaphumi inyoka le bethi ngibaloyela abafazi babo. Kodwa khathesi sokungathi kungcono noma nje singezwani,” kutsho uMnu Sibanda.
UMthunywa ubuye wakhulumisana losobhuku wale indawo uMnumzana Mdelwa Ncube ochaze ukuthi kulenyoka eyaphumayo esigabeni sakhe.
“Okukhulunywayo liqiniso inyoka yaphuma sibili kuthiwa ilala labomalukazana njalo ikhotha isilonda sesinye isakhamuzi,” kuphetha uMnu Ncube.
