uMthunywa
Listen Ndlovu
AMAGWILI angalinywa loba ngekhaya esivandeni. Lanxa kulemikhuhlane evame ukuwahlasela, amagwili okuzilimela ngekhaya akhula kuhle nxa elinywe kulandelwa indlela yakhona.
UMnunzana Stanley Dube ongumlimi olima epulazini eliseShangani ukhulume mayelana lemikhuhlane ehlasela amagwili.
“Amagwili alakho ukuhlaselwa ngumkhuhlane othiwa yi-early blight. Umkhuhlane lo uhlasela ikakhulu amahlamvu esilimo lesi. Nxa isilimo sesikhula amahlamvu ayaqala ukuba lamabala amnyama aqala ukubakhona emahlamvini angaphansi.
“Umkhuhlane lo isilimo siwuthola enhlabathini kungakho umlimi ukuze avikele isilimo sakhe kumele atshintshe isilimo kuleyondawo afake esitshiyeneyo okungaba yimbhida ngemva kweminyaka emibili,” kutsho uDube.
Amagwili lawo alakho ukuthi nxa esekhula abanjwe ngumkhuhlane wokubuna kwamahlamvu.
“Nxa amahlamvu amagwili esebuna umlimi ubona ngokutshintsha kombala wamahlamvu usiba lithanga. Kwesinye isikhathi amahlamvu ayagoqana abuye akhithike ikakhulu lawo ayabe engaphansi.
“Umkhuhlane lo uthwalwa yisilimo umlimi ayabe esisebenzisile, kungaba ngayabe esivunile wabuye wasilima futhi,” kutsho uDube.
“Omunye umkhuhlane ohlasela kubi amagwili ongawisa njalo ibhizimusi lomlimi ngothiwa yi-common scab. I-common scab uhlasela amagwili kusukela esasemancane ikakhulu nxa elamanxeba.
“Nxa isilimo sihlaselwe ngumkhuhlane lo umlimi ubona ngamagwili alamanxeba loba adabukuleyo nxa esevuna okudala njalo ukuba amagwili abole,” kutsho uMnu Dube.
