uMthunywa
Sasizwe, sibale, sibone emisakazweni, kumaphephandaba lakubomabonakude sekuthiwa izisebenzi zenkampani ethize sezikhalale umsebenzi. Kwesinye isikhathi lazo ezikaHulumende imbala ziyawakhumula amajogwe ziwalaxaze phansi zikhala ngeholo eliyabe selilincane.
Izisebenzi ziyabe zikhala ngokuthi iholo kalisahambelani lesilinganiso sezomnotho okumele imuli iyithole okubizwa ngokuthi yi-poverty datum line.
Kubuhlungu ukusebenza ungaholi kumbe uhola imali encane wena usazi amandla lokujulisa ingqondo oyabe ukufaka kulowomsebenzi uyebongwa ngensiba zikathekwane zona ezingabasisi umlilo noma owokubilisa amanzi elambazi.
Poverty datum line.
Ngikhumbula omunye umama engake ngasebenza laye wayekuthanda ukuqhatsha amankazana okumncedisa ngekhaya phela njengoba laye wayesebenza. Unkazana (usisi) nguye owayevuka ngovivi lukaMagadelina esiyakhangela uJesu emathuneni ephekela abantwana besiya esikolo laba abancane aphinde abagezise, abaphelekezele ayebatshiya khona esangweni lesikolo ukuze bangagxotshwa zimota, aphinde abalande nxa izifundo seziphelile.
Wayesebenza unkazana kungelalanga lokuphumula. Wayephumula nxa elele, wayegezisa izitsha ahlambe lempahla ngitsho lezangasese zakhe lomkakhe. Into eyayisuke ingidanise njalo ingimangalise yikuthi kwakuthi nxa inyanga isiphelile sekumele unkazana aphiwe imali yakhe uzwe sesithi kulembiza zakhe lezigqoko zakhe angaziboniyo, kungakho uzahwatsha ingxenye yeholo lakhe ayethenga lezo mpahla athi zicatshile.
Ngamanye amazwi empeleni wayekhomba ukuthi unkazana nguye otshontshe lezompahla, etsho ewahutshuza amanga aluhlaza tshoko okwenyongo yenkunzi yenyathi, engafuni nje ukumholisa. Into eyayingihlekisa sasisithi inkampani esasiyisebenzela ingaphuza ukusiholisa ngelanga elilodwa uthole esezonde enuka okobulongwe bechalaha obunethwe yimbolisamahlanga.
Banengi abantu abanje abathanda ukuqhatsha kodwa bengafuni ukuholisa izisebenzi zabo abanye abajwayele ukuhlukuluzwa ngabafana benkomo, wawuzwe inyanga isiphelile sekuthiwa iguqa elithize ladliwa yimpisi kumbe izinyane elithize lidliwe ngamakhanka sekumele umholo wakhe waleyo nyanga angawutholi, sekuyimbadalo yalelo zinyane.
Kuvamile endaweni enjalo ukuthi izisebenzi kazihlali njalo ekucineni uthola umuntu wakhona esehawula eswela umuntu ongamncedisa ngoba sebezwe indumela yakhe embi.
Ayixabene.
