uMthunywa
Cornelius Luphahla
ZIKHUZA imihlola izakhamizi zesigabeni seSitobelambizi eBinga ngemva kokumila kwembambayila ezindlini zelinye isela kungaziwa ukuthi ihlanyelwe ngubani okucine kubangela ukuthi lifulathele umuzi walo.
Isiga lesi senzakale emavikini amabili adluleyo lapho okuvuke kumile khona imbambayila ezindlini zikaMnumzana Delwayo Nkomo okucatshangelwa ukuthi kwabangelwa yikuba watshontsha imbambayila kwenye inyanga ebizwa ngokuthi nguMatolonyola.
Kuzwakale ukuthi imbambayila le kwesinye isikhathi kayibonakali ezindlini lezi okuyikho osokwenza uNkomo wabaleka watshiya umuzi.
UMthunywa uxhumane loNkosazana Cecilia Ndlovu oyisihlobo sikaMnu Nkomo obikele intatheli ukuthi imbambayila le eyamila endlini kaNkomo iyamangalisa ngoba ingagecwa ivuka isigcwele indlu yonke.
“Kangilankani ngembambayila le emila ezindlini zikaNkomo ngoba kangikaze ngizwe kuthiwa imbambayila iyamila yodwa ingahlanyelwanga. Isimanga yikuthi ungayigeca kusisa uyithola isinkulu okwesabekayo isigcwele indlu yonke.
“Lokhu kuveza sobala ukuthi akusimbambayila kaNkulunkulu kodwa ngeyabantu abagangela uNkomo, asazi ukuthi bambangisani,’’ kutsho uNkszn Ndlovu.
Esinye isakhamuzi sakule indawo esiziveze ngokuthi nguMavela sibikele intatheli ukuthi uMnu Nkomo watshontsha imbambayila yenyanga yikho kumila imbambayila emzini wakhe.
‘‘Abantu baphongukumangala ngesenzo esenzakala emzini kaNkomo esokumila kwembambayila khona kusaziwa ukuthi kudalwa yikuthi watshontsha imbambayila kaMatokonyola esazi ukuthi yinyanga.
Ebuzwa ngale indaba uMnu Nkomo uthe kazange atshontshe imbambayila, abantu bayamgcona njalo bamhlunga ngembambayila.
‘‘Kuliqiniso sibili ukuthi kulembambayila emila ezindlini zami kodwa kangikwazi ukuthi yahlanyelwa ngubani. Lokhu sokwenze ngaze ngatshiya umuzi wami ngoba imbambayila le ungaze uyigece kusasa ivuka isinkulu kakhulu.
‘‘Noma kunjalo mina kangizange ngatshontsha imbambayila kaMatokonyola, abantu bangiqambela amanga njalo bayangihlunga ngembambayila le. Bafuna ukungibulala, kangikwazi ukuthi ngilecala bani,’’ kutsho uMnu Nkomo.
Imizamo yokukhulumisana loMnu Matokonyola yehlule ngoba kuthiwe kakho ekhaya akwaziwa ukuthi waya ngaphi.
