uMthunywa
YiNtatheli kaMthunywa
ABADLALI benguqu kumathimu aku-Division One kumhlubulo ongezansi yelizwe balakho ukudlala bechelesile kulisizini nanko phela kubikwa sekuseduzane lokuthi kutholakale usekelo lwemali kuligi le.
Sekudlule iminyaka iligi le idlalelwa mahala, okuyikhona osekuwise isisindo senguqu, ikanti lamathimu asekhonone ngokuthi athwele nzima ukuhlanganisa indleko zokugcwalisisa imidlalo lokubhadala abadlali.
Isizini kaDivision One le ivulwa ngoMgqibelo njalo ilamathimu alitshumi lane.
Amathimu akuligi yalisizini abalisa iNtabazinduna, Talent Vision, ZPC Hwange, Bantu Rovers, ZRP Hwange, Technosphere, Trumus, ZRP Bulawayo, Casymn, Nust, Highlanders, Amagagasi, Hwange Juniors, Victoria Falls Tigers, Indlovu Iyayathela, Black Boots, Bulawayo Chiefs leMakomo.
Amaqembu amabili abedlala emahlangeni aphansi kumasizini adluleyo i-Makomo leMagagasi, kukhanya azimisele ukwenza ngcono kumnyaka wazo wesibili zigiqika kuDivision one, nanko phela asehle abhadala zonke imali zokungena kuligi.
Umgcinisihlalo weZifa kulumhlubulo welizwe uMusa Mandaza ubikele iphephandaba likazulu ukuthi ezemidlalo ziyaphucuka kulindawo, yikho nje amaqembu amanengi omdlalo kanobhutshuzwayo, ephatheka kumaligi la.
UMandaza ubike ukuthi isabelo sakhe siphakathi kokukhulumisana labathile abangabayingxenye yabo ekuthuthukiseni inguqu.
“Sikhangelele ukuthi sibelengatsha ezithile esizakhulumisa lazo ukuze sithole usekelo lwemali. Amathimu akuligi yethu ephezulu kungenzeka aphiwe imvuzo.”
Kuzwakale njalo ukuba iZifa iyasuthiseka ngokukhula kwenguqu esabelweni lesi ngoba isinanzelele ukuthi manengi amathimu kulindawo.
“Inhloso yethu yikuthi sithole usekelo lwemali, sinikeze labo abenza kuhle izicoco. Lokhu kuzaphathisa kakhulu ukuthi amathalenta abonakale kubadlali esilabo,” kutsho uMandaza.
“Konke sekulungile ukuthi siqhubeke ngokudlala iligi yethu kulisizini la2016.”
Imidlalo ekhona kulimpelaviki:
Ntabazinduna v Talent Vision (Ntabazinduna Prison), ZPC Hwange v Bantu Rovers (Hwange), ZRP Hwange v Technosphere (Hwange), Trumus v ZRP Bulawayo, Casymn vNust, Highlanders v Amagagasi (Barbourfields), Hwange Juniors v Victoria Falls Tigers (Hwange), Indlovu Iyayathela v Black Boots (Brady Barracks), Bulawayo Chiefs v Makomo (Fairbridge).
