uMthunywa
KUQATHEKILE ukubana abantu bahlele ikusasa labo ngendlela ephakemeyo njalo lokhu kwenza ukubana impilo zabantwana zihleleke. Amalungelo abantwana aqakathekile ukubana akhuselwe ngoba kunanzelelwa ukubana yibo abakhokheli bakusasa njalo yibo odokotela labosomabhizimisi bakusasa. Ilungelo lokwaziwa ligoqela izincwadi zokuzalwa kanye lesithupha ngoba yizo ezenza ukubana senelise ukuya esikolo, sithole imisebenzi, siholele emabhanga njalo sivote.
Kuqakathekile ukubana abazali balungisele abantwana ikusasa elihle. Incwadi yokuzalwa yenza ukubana abantwana baziwe elizweni ukuze nxa begula babhadale izimali ezinganeno ngoba kukhanya sobala ukubana bavela elizweni laseZimbabwe. Inengi labantwana kalenelisi ukubhala imihloliso ngoba bengelazo izincwadi zokuzalwa njalo kunzima ukubana bahambe emakolitshini nxa bengelazo izithupha kanye lencwadi zokuzalwa.
Abazali kumele baqakathekise ukubana bathathise izingane zabo incwadi zokuzalwa ngesikhathi belamaviki ayisithupha okuzalwa njalo akulamali ekhokhwayo nxa ungathathela umntwana incwadi yokuzalwa engakabi leminyaka eyisithupha kodwa kuyabe sokumele ubhadale i$2. Ungaphuza njalo nxa ungela birth confirmation record kumele uyibhadalele.
Kule iviki ngithole ithuba lokuxoxisana lojaha okuthiwa nguMkhokheli. UMkhokheli bazalwa babayisithupha kunina.
UMkhokheli wazalelwa esibhedlela seMpilo ngomnyaka ka1994. Unina wahlala engazange wamthathela incwadi yokuzalwa ngoba elinde uyise kaMkhokheli owahamba waphulula eGoli kuze kube lalamuhla.
UMkhokheli weza-ke eTrinity Project edinga ukuphathiswa ukuze abuyele esikolo njalo aqhubeke ngomdlalo we-boxing ngoba wayewuthanda njalo ephumelela kuwo waze wahamba wayafika kumncintiswano yabatsha (youth games). Kasazange waphumelela ngenxa yokubana wayengelayo incwadi yokuzalwa.
ETrinity Project samsiza ngokumphathisa ngokubana aqalele ngaphi ukuze athole incwdai yokuzalwa. Okokuqala waqala ngokuthatha ama-finger prints wabhadala i$5.Unina waqonda eMpilo wayathatha i-birth confirmation record. Emva kwalokhu waqonda esikolo sikaMkhokheli ukuyathatha incwadi echaza ukubana wafunda esikolo engelayo incwadi yokuzalwa .
Baqonda-ke koMsitheli belonina bephethe ama-finger prints, ibirth confirmation record, health card, incwadi yesikolo kanye le mali engange $2 yokuthatha incwadi yokuzalwa ngoba esedlulise iminyaka eyisithupha.
Unina kwakufanele abe ethwele isithupha sakhe njengoba ubaba wayengekho sewadliwa yindunduma zaseGoli. Wathatha-ke uMkhokheli incwadi yokuzalwa njalo watshelwa ukubana aphenduke ngemva kweviki eyodwa isiphumile njalo athathe isithupha.
Lakanye ngemva kweviki yayisiphumile njalo wathatha isithupha. Ngiloba nje uMkhokheli umanzi te ngokujabula ngoba esezaqhubekela phambili ngomdlalo wakhe we-boxing. Kuqakathekile ukuthi sihlale silethemba ukuze konke kuyalunga, okukhulu yikukhuthalela ukulungisa ikusasa lezingane zethu.
Kasihlanganeni njalo kuviki elizayo.
Umlobi utholakala kukheli ethi [email protected] loba kunombolo ezithi 0773195055.
