uMthunywa
YiNtatheli kaMthunywa
KULANDELA ukukhitshwa kweqembu leTsholotsho FC kunkundla zePSL lonyaka, isikhona ithimu yemaphandleni ebika ukuthi layo izangena kuligi ephakemeyo njengalokho okwenziwe yiziqholo zeZhwane.
ILukosi Pirates, iqembu elidlala lisemaphandleni eHwange esabelweni seMatabeleland North ibika ngokuzethemba ukuthi ngemva kweminyaka emithathu lizabalelwa kulawo adlala enkundleni zePSL.
Iqembu leli liyaphambili ngokuphakamisa ithalenta eliphuma emaphandleni esinqinti seHwange kuphela.
Iqembu leLukosi Pirates labunjwa ngesizini ka2015 njalo lilabadlali abangaphansi kweminyaka engu-25 abalesifiso sokuthi baqhubekele phambili ngokunqoba bafinyelele ukuncintisa kumaligi aphezulu.
Umaneja omkhulu waleliqembu uPeterson Ncube ubike ukuba ithimu yabo yasungulwa ngabafana abasakhulayo abalothando lomdlalo wenguqu abakubona kufanele ukuthi babumbe iqembu elizaphathisa ukubonakalisa ithalenta elikhona esigabeni sabo.
Abadlali bakuqala baleliqembu kubikwa bavela enzikini yeLukosi Growth Point, indawo engamakhilomitha alitshumi lantathu nxa usuka edolobheni leHwange. Iqembu leli libika ukuthi lifuna ukukhipha abadlali abazabatshazwa ilizwe lonke.
“Iqembu leLukosi Pirates labunjwa ngomnyaka ka2015 ngabasakhulayo abadlala ibhola labasekeli babo. Ngemva kokunanzelela ukuthi kulethalenta elingasetshenziswa ngemfanelo phakathi kwabo, abadlali babopha isinqumo sokuthi bahlangane kube leqembu elizaphakamisa indawo yabo kanye labo.
“Ngokunjalo, iLukosi Pirates izaqina ngokudinga abadlali benguqu abaphuma kulindawo yeHwange, ikakhulu emaphandleni. Abadlali benguqu kumele bancediswe ukuze behlukane lokuxabana lomphakathi. Nxa ithalenta likhona, kungumlandu wethu ukuthi sincedisane siphakamise abasakhulayo,” kutsho uNcube.
ILukosi Pirates okwamanje igijimisa abadlali enkundleni yayo yesikolo seLukosi Secondary, okwenza kubelula ukuthi labafundi balesisikolo baphatheke kumisebenze yeqembu.
Umgcinisihlalo weZifa eMatabeleland North, uDennis Tshuma ubike ukuba ulokuthokoza ngokusungulwa kwamaqembu afana leLukosi Pirates.
UNcube wengeze ngokubonga ikhansili yeHwange Rural District Council ngokusekela iqembu.
“Iqembu lethu libonga kakhulu ikhansili yeHwangwe Rural lenhlanganiso yeZimbabwe Football Association eMatabeleland North. Ikhansili yethu incedise ukuthi sibhadale ezinye indleko zenhlanganiso yeZifa.”
