uMthunywa
Yintatheli kaMthunywa
INHLANGANISO yeBasketball Union of Zimbabwe (BUZ)iphakathi kwetshe lembokodo nanko phela isikhangelane lokwehluleka ukuhambisa amaqembu okumele ayencintisana lamanye amazwe emazweni ngenxa yokuswela imali.
Umongameli weBUZ uAddison Chiware utshele iphephandaba likazulu kuliviki ukuthi sebeswela ubuthongo ngokudinga labo abangancedisana labo ukuze amathimu abo amela isizwe enelise ukuyadlala.
Ukuswela imali sekujwayelekile kumathimu e-basketball njalo isikhalazo lesi asiqalisi ngoba inhlanganiso yeBUZ yathwala nzima ithumela ithimu okwakumele iyencintisa kumidlalo ye-Afro-basketball.
Iqembu leZimbabwe lalifuna imali efika $200 000 ukuze lilungiselele lokuthi lenelise ukuya emdlalweni yeAfro-basketball le.
UChiware uthe inhlanganiso yabo isibumbe ikomithi ephiwe umlandu wokuqoqa amankampani lengatsha ezingancedisa ukulungisia loludubo.
“Siphezulu kokukhulumisana labantu abangenelisa ukuphathisa ngemali ikakhulu amankampani. Silokwethemba ukuthi sizahlanganisa konke lokhu inyanga le ingakapheli.
UChiware uthe inhlanganiso yeBUZ iqoqe ukuthi nxa imali isikhona, ithimu yesizwe ithole isikhathi eside sokuthi ilolonge, anduba ithunyelwe ukuyancintisa.
“Sisifa ukuthi iqembu leZimbabwe liyelolonga ngaphandle kwelizwe kuseselesikhathi. Imali ingabakhona kuzakubalula ukukwenza konke lokhu,” nguChiware lo.
