uMthunywa
YiNtatheli kaMthunywa
PHEZU kokuqala isizini ngegiya eliphezulu komgadli weMpumalanga Black Aces, uCollins “Ntofontofo” Mbesuma, eqhulula amabhola, kodwa kubonakala kusazoqhubeka ukuthi umgadli ovelele ku-Absa Premiership ehluleke ukufinyelela kumagoli angaphezulu kuka-15.
Ngemuva kwemidlalo engu-23 kwengu-30 yeligi, uMbesuma usakhokhela phambili ngamabhola angu-13 emidlalweni engu-23. Lokhu kutsho ukuthi umgadli lo, oseyeke amathuba amaningi emidlalweni edlule, usalelwe yimidlalo eyisikhombisa ukuthi enze kangcono kulomdlali weFree State Stars, uMoeketsi Sekola, owatshaya amabhola angu-14 awatshaye ngesizini edlule.
Ngesikhathi kuqala isizini uMbesuma, wake watshaya amabhola angu-25 ngesizini eyodwa ka-2004/2005.
Nxa uMbesuma eqhubeka ekhokhela kanje, lokhu kuzakutsho ukuthi isazoqhubeka isale imibuzo ngokuthi: Lokhu kungabe kusitsho ukuthi iligi yaseSouth Africa ikuzinga eliphansi na?
Umgadli wePlatinum Stars, uNdumiso Mabena, osetshaye amabhola ayisikhombisa, laye wehlulekile ukuphendula umbuzo wokuthi kungani abagadli bakuleli bengakwazi ukufinyelela emambuleni.
“Mhlawumbe lathi senza into eyodwa njalonje. Kodwa-ke akukho ukucatsha ngesithupha, umsebenzi womgadli ngowokutshaya amabhola nxa ephambili,” kutsho uMabena kuSuperSport.
Abanye abadlali abalethuba lokugudluza uMbesuma nguPrince Nxumalo owe-Ajax Cape Town olamabhola angu-11 emidlalweni engu-17. Umgadli weSuperSport United, uJeremy Brockie, oseqhulule angu-10 loThobani Mncwango wePolokwane City, laye olamagoli angu-10.
Kwacina ngoSiyabonga “Bhele” Nomvethe ukuthi umdlali wePremiership afike kumagoli angu-20 akwenza ngesizini ka-2011/2012 esayibambile kuMoroka Swallows.
UBhele wayeqeda indlala yeminyaka eyisithupha kungekho umdlali ohlohla amabhola angu-20 loba aphezulu.
Ngemuva kukaNomvethe, uKatlego Mashego wahlonitshwa njengohamba phambili ngokuvalela amabhola angu-13 kusizini yonke ka-2012/2013. Ngesizini eyalandelayo isibalo samabhola lesi sehle kakhulu kubongwa umdlali weKaizer Chiefs, uBernard Parker ngokutshaya amabhola angu-10 ngesizini ka-2013/2014.
