uMthunywa
YiNtatheli kaMthunywa
ABADLALI be-pool koBulawayo bayehluleka ukuthathela iqembu leKings inkezo yokuba yintshantshu yalumdlalo nanko seliphindile futhi ukuthatha yonke imvuzo yalonyaka.
Iligi ye-pool koNtuthu iphele ngeviki edluleyo.
IKings isiyintshantshu okweminyaka emihlanu ilandelana. Iqembu leli liphiwe imvuzo yalo yinhlanganiso yeBulawayo Pool Association ngoMgqibelo enkundleni yeRaylton Sports Club.
Iqembu leNtumbane liphinde lenza iphutha elifanayo lokukhalala umdlalo iligi isibanga ukuphela.
Emsileni welogu yeBPA kuxotshwe amathimu abalisa iSkittle Inn, iDouble Punch, iDragon leTshabalala. Amathimu la kubikwa bekufana lokuthi ayaphelekezela kuligi.
Isimo somdlalo besime kakubi kuqembu leKings sekubangwa emaphethelweni, kuncede ukwahlukana kwemiklomelo lokho okubizwa ngokuthi yi-frame difference.
Kusukela ngoNtulikazi ithimu yeNtumbane yiyo ebikhanya angathi izathatha inkezo yeBPA.
Isikhulumi seBPA uDonald Wadawu uthe iqembu leKings lenze imbali ngokuthwala inkezo kahlanu.
“Inkezo isingeyabo ngoba nxa sebeyithethe okwesihlanu ayisaphenduki emawofisini ethu. Benze kuhle abadlali beKings, sibatshayela ihlombe.
“Intshantshu zethu labadlali abenze kuhle bazaphiwa imvuzo yabo ngokusemthethweni mhlaka12 Mpalakazi.”
UWadawu uthe iligi yabo izayemukela amathimu amatsha avela ku-division one iSouthwold, iFairbridge, iMasters leNtabazinduna.
Inhlanganiso yeBPA ibike ukuba ngeviki elizayo izaqhuba umncintiswano yama-play-off okudinga amathimu lapho okuzadlala khona abadlali beKings, New Complex, iMasters, iSouthwold, Ntabazinduna, iFairbridge, Metropolis leDelta Beverages.
