uMthunywa
Nomthandazo Ndlovu
BEKUNGABIZWA ozwayo esikolo seKing George V1 koBulawayo ngoLwesine kuviki ephelileyo kuthakazelelwa iminyaka engu-60 isikolo lesi savulwa.
Ekhuluma loMthunywa uNkosikazi Perseverance Hadebe ongumphathisikolo uthe bayajabula njengesikolo ukuthi sebefikise iminyaka le abantwana besenza kuhle ezifundweni zabo.
“Kuyasithokozisa kakhulu ukubona abantwabethu besenza into enhle kanje, kumnyaka odluleyo abantwana bapasile sibili ngoba impumela yabo ibe yi-100% okusijabulise kakhulu,” kutsho uNkkz Hadebe.
UNkkz Hadebe uqhubekele phambili ebonga ababalisi kanye labanye asebenza labo ngokuzinikela emsebenzini wabo osekwenze bafika iminyaka engamatshumi ayisithupha bengela okuhluphayo.
“Ngithanda ukubonga ababalisi, omongikazi bethu ngokusebenza ngokuzinikela loba kulenhlupho esikhangelane lazo njengesizwe, kodwa ngenxa yesitsho sethu esithi, ‘Never give up’ lokhu siqhubekela phambili,” kuqhubeka uNkkz Hadebe.
UProvincial Education Director uNkosikazi Olicah Kaira obengumhlonitshwa emcimbini lo uncome isikolo seKing George V1 ngokusebenza nzima.
“Mina ngake ngafundisa lapha njalo ngiyazigqaja kakhulu ngoba ngemva kweminyaka le engamatshumi ayisithupha, abanye abafundi balapha sebaqeqetsha kumanyunivesithi amakhulu akuleli, abanye basabalele emazweni ehlukeneyo omhlaba baphakamisa ibizo lesikolo lesi,” kuchaza uNkkz Kaira.
“Ukufikisa iminyaka engamatshumi ayisithupha kweKing George V1 yikuqalisa kwezimanga,” kutsho uNkkz Kaira.
UMnumzana Sindile Mhlanga oseleminyaka engamatshumi amathathu lantathu efundisa eKing George uthe leli lilanga elimnandi kakhulu kuye njalo ubonga iKing George V1 ngokumnika amathuba amahle kakhulu.
“Lelilanga lalamuhla liyangijabulisa kakhulu, liyisibonakaliso sokuthi mina njengombalisi sengikusiphi isigaba, isikolo lesi sesinginike amathuba amahle kakhulu njengoba sengihambe amazwe amanengi ngenxa yalesi isikolo,” kuchaza uMnu Mhlanga.
Ekhuluma loMthunywa omunye umzali, uNkosikazi Moddy Nxumalo uthe uyabonga ababalisi besikolo lesi lezinye izisebenzi ngokuphatha kuhle abantwana.
“Indlela abantwana abaphethwe ngayo yilesi isikolo iyasijabulisa kakhulu thina njengabazali, senza imisebenzi yethu sikhululekile sikwazi ukuthi abantwana baphethwe kuhle esikolo,” kutsho uNkkz Nxumalo.
“Abantwabethu loba begogekile sebekwazi ukuzenzela eminye imisebenzi nje yendlini njalo esikolo bahlezi kuhle kakhulu akufani lendlini lapho ababezibona ukuthi behlukile kwabanye, esikolo lapha wonke umuntu uyafana, lokhu kuyabanceda kakhulu,” kuqhuba uNkkz Nxumalo.
IPremier Service Medical Investments layo ibikhona kulumcimbi njalo banike isikolo impuphu kanye lamanamunede.
