uMthunywa
Nkosilathi Sibanda
ABADLALI benguqu abavela kwamanye amathimu abalesifiso sokudlalela iHighlanders abakhohlwe ngoba abasoze bathole ithuba.”
La ngamazwi kaCosmas Zulu.
UZulu, ongomunye wabaqeqetshi abalolonga iBosso kusamelelwe umqeqetshi omutsha uErol Akbay, uthe kulisizini bahlose ukugijimisa “abafana beBosso” kuphela.
“Ikhuba lokweboleka alilandima. Sifuna abethu abadlali. Sesinanzelele ukuthi njengeHighlanders silolongela amanye amathimu abadlali. Abadlali baza ngobunengi babo ukuzocupha ubungcitshi bethu, ekucineni kwesizini abadlali labo bayasifulathela.
“Khathesi sesihlakaniphile, lonyaka asivumi abadlali abavela kwezinye indawo. Sesikhulume saphelela ukuthi sizaphakamisa abadlali abaphuma kumathimu eHighlanders amancane. Kulethalenta elinzima elisakhulayo, angeke sekele ukuthi ithalenta lelo lihluthunwe ngamanye amathimu,” nguZulu lo ekhuluma esenkundleni yeBarbourfields ngoLwesithathu.
UZulu ukhulume egcizelela ukuthi iHighlanders isidiniwe ngokutshontshelwa abadlali ngabaqeqetshi abathi basebenzela iBosso ikanti bayabhidliza.
“Babebuya la bezositshontshela abadlali bethu, becabanga ukuthi asibaboni. Iqiniso laziwa ngumuntu wonke olandela inguqu koBulawayo ukuthi kulamathimu avuka phezulu kweBosso.
“IHighlanders ilekolitshi lenguqu elikhulu ukwedlula wonke amathimu aseZimbabwe. Ikolitshi leli sifuna ukuthi kube yilo elincedisa ukuthi ithimu enkulu iyephambili.”
Umbono kaZulu ugcizelelwe ngumgcinisihlalo weBosso uPeter Dube ngeSonto kumhlangano wamalunga alithimu.
“Sekuyisikhathi sokuthi sisebenzise abadlali bethu abakumaqembu ama-juniors. Singekela ukusebenzisa ithalenta leli lisakhula, kutsho ukuthi siyabe singawazi umsebenzi wethu,” nguDube lo.
Kusenjalo, amalunga oqobo aweHighlanders atshelwe ukuthi ithimu isivumelane labadlali bonke ababekhona kuligi yeCastle ngo2015 ngaphandle kokulahlekelwa nguTeenage Hadebe, uObadiah Tarumbwa abakuChicken Inn loValentine Ndaba osegijimela ijesi kuDynamos.
