uMthunywa
Gladmore Ncube
KULENINA lePlumtree esiqintini seGoho elibhuqwe ngumkalo qede walixotsha kubangwa ukuthi kungani esefuna basebenzise ikhondomu emacansini.
UMnumzana Arnold Maphosa kubikwa utshaye waxotsha umkakhe, uNkosazana Silethemba Mathe ngeviki edluleyo ngoba eyale ukuhlangana laye emacansini kungelajazi lomkhwenyana.
Intatheli ikhulumisane lomfakazi ongumakhelwane walezi zithandani (ibizo siligodlile) othe loba nje kubuhlungu ukuthi abathetheneyo basebenzise ijazi lomkhwenyana kodwa kamsoli uMaMathe ngesinqumo sakhe ngoba uvikela impilo yakhe.
“UMaphosa vele utshwala buyamphambanisa ikhanda ngoba ngezake uhambe uyedakwa ulale labomahotsha ubuye ufuna ukuhlangana lomkakho ungazivikelanga.
“Kambe kungathi bonke abantu besazi ukuthi ulitshapha esigabeni, uthanda omahotsha bebhawa abesesithi umkakhe akwamukele ngesihle.
“Angazi ukuthi uMaMathe wenziwani nguMaphosa ngoba nginguye aluba sengasuka ngabuyela kithi ngadinga indoda ezangithanda ingihloniphe futhi,” kuchaza umfakazi lo oqotho.
Intatheli ikhulumisane njalo loMnu Maphosa ngaloludaba wathi bake baxabana lomkakhe kodwa okokuthi baya njani emacansini kasoze akuvezele iphephandaba.
“Akula muzi ongathunqi intuthu njalo koniwa ngomlomo kuphinde kulungiswe ngawo umlomo. Angali ukuthi ngike ngaxabana laye umkami kodwa sesikulungisile ngakho-ke ngezake ngiveze ukuthi ucansi lwethu silwenza njani.
“Lokho okokuthi ngilala labafazi bebhawa ngamanga, mina engikwenzayo yikuthi ngingadakwa ngigide labo njalo wonke umuntu uyakwenza lokhu, yindaba kukhangelwa mina kuphela,” kutsho uMnu Maphosa.
UMthunywa ukhulumisane njalo loNkszn Mathe ngaloludaba othe umkakhe uyahlupha engadakwa yikho nje behlala bexabana.
“Amahungahunga akhona sibili okuthi ubaba kukhona akwenzayo ebhawa engadakwa njalo ngezake ngimphikele ngoba mina ngiyabe ngingekho ebhawa ngaleso sikhathi esenza lokho abathi uyakwenza.
“Mina angixabani laye umkami ngoba ngiyamthanda kodwa ukumthanda kwami akutsho ukuthi angilandaba lempilo yami yikho nje ngithethe amanyathelo okuthi sisebenzise ikhondomu.
“Ngathi ngiqala ukumtshela ngodaba lolu kwamcaphula kakhulu saze sacina sesifika ebangeni lokuthi ngibaleke ngingalali ekhaya. Okuhle khathesi yikuthi sesixolelene,” kuphetha uNkszn Mathe.
