uMthunywa
INANI labantu asebetholakale belegcikwane leCovid-19 eZimbabwe selifike kutshumi lanye, kukanti isigulane esivele kuyonane iviki likhehla lakoBulawayo elileminyaka engu-79 elibhubhe ngempelaviki, okutsho ukuthi kuleleli kulabantu ababili asebebulewe yisifo lesi.
Ikhehla leli kubikwa libhubhe ngoMgqibelo kwesinye isibhedlela sakoBulawayo.
Umuyi kalambali yokuvakatshela phandle kwelizwe, kodwa waveza ukuthi uke wavakatshela indawo yokwethekelela eHwange mhlaka 14 kusiya ku 16 Mbimbitho. Kusitatimende, unobhala omkhulu kugatsha lwezempilakahle lokondliwa kwabantwana uDokotela Agnes Mahomva uthe umuyi wangena esibhedlela ezokwelatshwa kucatshangelwa ukuba angabe ele-pneumonia.
“Ugatsha luthanda ukubika ukuba i-National Microbiology Reference Laboratory (NMRL) ihlole amasampuli angu-21. Phakathi kwala ahloliweyo isampuli elilodwa litholakale lilegcikwane le-Covid-19 okutsho ukuthi abantu asebatholakala belegcikwane leli bangu-11 kuleli. Kusenjalo, lo otholakale elegcikwane leli ubhubhe ngoMgqobelo mhlaka 4 Mabasa 2020 esibhedlela,” utsho njalo.
UDkt Mahomva uthe umkhuhlane waqinela umuyi ngelanga elaliswe esibhedlela wasiwa ku Intensive Care Unit (ICU) lapho ayekhangelwa khona ehlukaniswe labanye abantu.
“”Iqula labakhangela ngeze-Covid-19 labizwa kwathathwa amasampuli asiwa e-NMRL ukuze ayehlolwa. Kusalindwe impumela yokuhlolwa kwamasampuli, lo osengumuyi wayephiwa ama-antibiotic njalo eselatshwa njengomuntu okucatshangelwa ukuba ulegcikwane le-Covid-19.
“NgoMgqibelo umkhuhlane wala ulokhu umqinela okwabangela ukuba edlule emhlabeni.”
UDokotela Mahomva uthe kusalondwa abantu bonke abake babaseduzane lomuyi njalo ugatsha lwezempilakahle lusebenza ngokuqaphela okukhulu ngalumkhuhlane osewabulala abantu abedlula 80 000 emhlabeni wonke jikelele kukanti abatholakala belomkhuhlane lo bangu-1, 4 miliyoni emhlabeni wonke jikelele.
Ukhuthaze izizalwane zakuleli ukuthi zilandele imilayo eziyiphiwayo ngokuhlanzeka ukuze kuvikelwe i- Covid-19.
UHulumde sowethula ukuba abantu bahlale ezindlini okwensuku ezingu-21 ukuze kulawulwe ukuhambahamba kwabantu njengemizamo yokuvikela ukumemetheka kwegcikwane leli.
