uMthunywa
Charity Moyo
IQEMBU elaziwa ngokukhuthaza abasakhulayo kwezemigido ukuze iziphiwo zabo zivele mgceke selibone kuyinto ebalulekileyo ukuthi lifundise ontanga ngendlela zokuvikela ukumemetheka komkhuhlane wengculazi.
Ekhuluma lentathelizindaba umqondisi weqembu leli uMnumzana Plot Mhako uveze ukuthi lokhu bakubona kubalulekile ngoba abasakhulayo kabasatholi imfundiso ikakhulu ebazalini babo ngoba isikhathi sabo esinengi basiqeda besezikolo. Ubuye waveza ukubana okuhle ngalokhu yikuthi imfundiso le bayipha untanga ophatheka kuleliqembu kuthi yena abesefundisa abanye bakhe ezikolo lakweminye imidlalo kanye lemicimbi okuyabe kulabasakhulayo.
“Sakubona kuyinto eqakathekileyo le ngoba inengi labantwana abasakhulayo bazithola sebephila lalo umkhuhlane ngoba bengafundiswanga ngokugcweleyo.
“Esakunanzelelayo yikuthi isikhathi esinengi abantwana bahlala besezikolo ngakho abazali kabasitholi isikhathi sokufundisa abantwana,”kutsho uMnu Mhako.
Uveze ukuthi imfundiso yabo ivezwa kabanzi zindikimba eziyabe ziqukethwe zingoma, imigido kanye lezinkodlo lemidlalo abayenzela abasakhulayo. Lokhu kuyabe kuqukethe imfundiso ezimbalwa ezigoqela ukuziphatha, indlela abangazisebenzisa ekuzivikeleni nxa besiya emacansini, ukuthi umuntu osephila lalo umkhuhlane engaphathwa njani kanye lokungayi emacansini umuntu aze ayekwenda oba athathe.
“Imfundiso yethu igxile kukho konke ngoba siyakwazi ukuthi bakhona abasakhulayo abaphila legcikwane leli kuthi njalo abanye basadinga imfundiso ejulileyo ngokuziphatha kumpilo yansuku zonke.
“Kulabo abaphila legcikwane siyabafundisa labo kanye lokubabonisa ukubana ikhona impilo ngemva kwalokhu,” kuveza uMnu Mhako.
Uphethe ngokuthi injongo yabo yikufundisa abatsha kanye lezizukulwane ezizalandela ukuze ukumemetheka kwalomkhuhlane kube kulutshwana kwabatsha eminyakeni elandelayo.
“Injongo kanye lesifiso sethu yikubana ukumemetheka kwegcikwane leli kube kulutshwana kubontanga kanye lakuzizukulwane ezizalandela eminyakeni elandelayo.
“Ngakho sizafundisa ngendlela ezijulileyo ukuze intsha ikuzwisise njalo ikwamukele,” kuphetha uMnu Mhako.