uMthunywa
Cornelius Luphahla
KUCHITHEKE igazi edolobheni leLupane lapho enye indoda egwazane lomntanomnewabo yalimala kabuhlungu bebanga intombi.
Impi le yenzakale kuviki ephelileyo lapho uMnumzana Naison Ndlovu alwe lomntanomnewabo uMnumzana Eric Ndlovu wasemgwaza enqulwini ngemva kokumthola loNkosazana Charmaine Ncube endlini yakhe.
Kubikwa uMnu Ndlovu ubethandana loNkszn Ncube okuyikho okudale ukuthi alwe lomntanomnewabo ngoba ebathole bethandelene.
UMthunywa ukhulumisane loMnumzana Brighton Moyo onguye olamule ababili laba walandisa ngendaba le ethi bahlala bexabana bebanga uNkszn Ncube.
“Mina ngezwa umsindo ngemva kwesitolo ngagijima ngaya khona ngathola uNdlovu esegwazwe inqulu nguEric ngasengibalamula. Ngathi ngibuza ukuthi babangani uEric wathi utholwe nguNdlovu endlini kaNkszn Ncube wasemtshaya wamkhiphela ingqamu efuna ukumgwaza yena wabaleka waphuma phandle kwendlu weza ezitolo.
“Wathi engakafiki uNdlovu wambamba okuyikho okudale ukuthi amgwaze. Ngalesosikhathi ngabiza abantu sathwalela uNdlovu esibhedlela seSt Luke’s uEric wabotshwa ngamapholisa,” kulandisa uMnu Mnu Moyo.
Ebuzwa ngale indaba uMnu Ndlovu uthe kazange wafuna ukugwaza umntanomnewabo njalo kathandani loNkszn Ncube.
“Mina kangizange ngafuna ukugwaza uEric njalo kangithandani loNkszn Ncube. U-Eric uhlala engigcona ethi ngithandana laye. Loba kunjalo kangikaze ngimphendule kubi kodwa okungimangalisayo yikuthi ngalelolanga ngathi ngingemva kwesitolo kwadlula uNkszn Ncube wahle wabuya egijima ethi bengilaye wangigwaza,” kutsho uMnu Ndlovu.
UNkszn Ncube uthe yena uthandana labo bonke njalo kakwazi ukuthi kungani besilwa bona beyizihlobo.
“Mina uNdlovu loEric siyathandana sibili kodwa nje ngiyazisola ngosokwenzakele njalo ngiyamangala ukuthi kungani belwile bona beyizihlobo kulokuthi bakhulumisane. Ngokunjalo ngizakwehlukana labo bonke ngoba bazacina begwaza mina,” kuphetha uNkszn Ncube.
