uMthunywa
NguLucky Tshabalala
IHONOURS Academy yiyo encinte wonke amakolitshi akoBulawayo kumncintiswano wokugijima obuqoqwe yinhlanganiso yeBulawayo Colleges Sports Association (Bucosa), eSizinda ngoLwesihlanu ngeviki ephelileyo.UNhlanhla Ncube wekolitshini yeVulindlela nguye onqobe abanye bonke kumjaho wamamitha angu-5 000, elandelwa nguHendix Mahlangu lo Khohlwani Ngwenya abekolitshini le Grandeur Christian College .
Kukanti-ke emjahweni ofanayo wamantombazana uPeacemore Kanende ofunda ekolitshini leHonours Academy nguye onqobe wonke amantombazana elandelwa nguSithandazile Ncube loSibusisiwe Ndaba abekolitshini leGrandeur kanjalo.
Ngemva kwale imijaho iGrandeur Christian College yiyo ebikhokhela ngemiklomelo engu-97.
Kuzokuthi kumincintiswano yokuphosa i-discus le shotput uPretty Marangwanda nguye ojike ukwedlula wonke amankazana aleminyaka engaphansi kwengu-16 elandelwa nguNatasha Madzivadondo weGrandeur Christian College.
Kukanti ke ebafaneni uMarvelous Tshuma weHonours Academy nguye ophose ukwedlula bonke abafana.
Ekhuluma lephephandaba likazulu umqeqetshi weHonours Academy uNkululeko Ngwenya uveze ukuthi bebewulindele ngamehlo abomvu umncintiswano lo yikho nje bebehlome baphelela.
“Besiwulinde ngamehlo abomvu lumncinti-swano njalo besizilungiselele ngokugcweleyo impela yikho sinqobile,” kutsho uNgwenya.
IHonours Academy isuke yaqinela amanye amakolitshi kumincintiswano yokuphosa i-discus leshotput.
IHonours Academy ibe lemiklomelo engu-359, ilandelwa yiGrandeur Christian College ebelemiklomelo engu-355, yona ilandelwa yiSkies For Good Hope ebilemiklomelo engu-261 kuzokuthi iVulindlela yona ibilangu-121 ilandelwa yiPlartform College ngemiklomelo engu-62 emsileni bekuleZimbabwe College ebe lemiklomelo engu-10.
IBucosa yinhlanganiso yezemidlalo yamakolitshi akoBulawayo. Injongo yayo ngeyokudingisisa njalo lokuthuthukisa iziphiwo zabafundi bemakolitshini.
