uMthunywa
Ethel Ncube
INDUNA uSigola yesigabeni seMzingwane esabelweni seMatabeleland South ekhothame ngoMvulo kuyonale iviki izafihlwa ngoLwesihlanu epulazini layo.
Umngcwabo wenduna uZephania Sigola ebisileminyaka engu-96, uzabhadalelwa nguHulumende kulandelwa umthetho okhona wabakhokheli bomdabu.
Induna uSigola ibhubhele esibhedlela seUnited Bulawayo Hospitals ngemva kokugula isikhathi eside.
United Bulawayo Hospitals
Induna uNgungumbane oyisihlobo senduna uSigola uthe uSigola ubeyindoda ezwisisayo njalo ethanda intuthuko.
“Induna uSigola yakhulela ngakithi, yasibuya eSiphezini isilijaha lapho afika wafunda eSiphezini Secondary School. Ubeyindoda ezwisisayo, ezehlisayo futhi ethanda intuthuko. Ubengumthombo wolwazi kithi sonke,” kuchaza induna uNgungumbane.
Kubikwa induna uSigola yayithethe kodwa unkosikazi wakhe wedlula emhlabeni, kasazange aphinde athathe futhi.
Kubikwa induna uSigola ibibikele abaseduzane layo ngalapho efuna ukufihlwa khona.
Indunankulu enguMsekeli kamkhokheli wenhlanganiso yeZimbabwe Chiefs’ Council, uMtshana Khumalo ufakaze ngalokhu. Kubikwa induna ikhotheme ngoMvulo ekuseni ngemva kokugula isikhathi eside.
“Samukele umbiko ovele kumkhokheli weChiefs Council uFortune Charumbira ebika ukuba induna uSigola ikhotheme ngehola letshumi ekuseni ngoMvulo esibhedlela. Silahlekelwe kulumhlubulo welizwe ngoba induna uSigola ubengumthombo wolwazi,” kutsho induna uMtshana Khumalo.
