uMthunywa
YiNtatheli kaMthunywa
IQEMBU leFC Platinum kukhanya lifuna ukubhidliza ithimu yeBulawayo Chiefs ngesizini ezayo, nanko kubikwa selithenge abadlali abahlanu.
Phakathi kwabadlali abahlanu laba, uIshmael Wadi uhamba phambili njalo umdlali lo ulakho ukuthi asayine isivumelwano lezimbamgodi lamuhla emini.
Phakathi kwabadlali laba kuloNqobizitha Masuku weHighlanders.
Kubikwa abadlali laba baphiwa imali yabo kusukela lamuhla ngoba izimbamgodi zePlatinum zifuna ukuqalela amathimu wonke ukubutha ingcitshi zabadlali ezikhona.
UMthunywa ukubika ngokugcweleyo ukuba uMasuku uphakathi kokuxoxisana labaphathi beFC Platinum.
Abafakazi abaphethe udaba lolu ngokuphezulu bathe uWadi, uMasuku labanye abadlali balubhekise enkundleni yeMandava lapho okuzakuba likhaya labo okwamasizini amathathu alandelayo.
Kusiyatshona elalamuhla, abadlali laba bazabe sebesayine isivumelwano leFC Platinum.
Kubikwa umqeqetshi wezimbamgodi uNorman Mapeza wakutsho kudala ukuthi ulesifiso sokuqeqetsha uWadi. UWadi ngumgadli weBulawayo Chiefs okhokhele ngokuhlohla amabhola amanengi.
UWadi ngumdlali owayekhangelelwe ukuthi athengwe yiHighlanders ngesikhathi isaqeqetshwa nguBongani Mafu.
Iphephandaba likazulu liphethe eliqotho elithi uMapeza watshayela umqeqetshi weBulawayo Chiefs uThulani Sibanda emazisa ngoWadi.
“Ngemva kokuhawukela umdlalo kaWadi, uMapeza kafihlanga ukuthi uyamfuna umdlali lo eqenjini lakhe. Ubengazi lapho ukuthi uzabona elinye ithalenta kwabanye abadlali.
“Kumele abahlanu njalo phakathi kwabo kuloIshmael Wadi osemlonyeni yamathimu amanengi. Singazi kumbe bazayine izivumelwano leFC Platinum ilanga lalamuhla lisiyatshona?” kutsho isisebenzi seBulawayo Chiefs esiseduzane laloludaba.
UWadi ukhethe ukuxhamanda ngaloludaba loba nje evumile ukuthi uzasuka kuBulawayo Chiefs.
“Ngiyasuka kuBulawayo Chiefs. Iqembu liyazi ukuthi sengifuna ukuhamba,” nguWadi lo ongathandanga ukuthi atsho okunengi.
Isikhulumi seFC Platinum uChido Chizondo sikhethe ukudlulisela phambili umbuzo ngenyathelo lethimu yakhe.
Umqeqetshi weChiefs uThulani Sibanda ubengabambeki ecingweni ngesikhathi uMthunywa udingisisa ngekusasa labadlali bakhe.