uMthunywa
Mthokozisi Dube
UMGCINISIHLALO weDynamos uKenny Mubaiwa ubike ukuthi mhlawumbe ithimu yakhe yathenga ‘‘ingulube esesakeni’’ nanko akasiboni isizatho sokusebenzelana lomqeqetshi uPaolp Jorge Silva.
UMubaiwa ubikele iphephandaba likazulu ukuthi nxa umqeqetshi lo ezakuba lesifiso sokuthi anqobe kunguqu, kumele aqale azinuke amakhwapha abengumuntu omdala.
“Mhlawumbe senza iphutha, sisithi silomqeqetshi. Isizatho sokuqhatsha lumuntu (Silva) sesiphenduke saba yize,” kutsho uMubaiwa kuliviki.
“Umqeqetshi lo nxa efuna ukuphumelela loba kuliphi iqembu kumele akhule, abeyindoda.”
UMubaiwa uthe ngokuvulwa kwesizini yalonyaka, iDynamos isikhanya iliqembu elisemlonyeni yabalandeli bomdlalo ngoba liqale umnyaka ngokudlala udaka.
“Ukwehluleka ukudlala kweqembu leli kudonsa amehlo abalandeli bethu. Indlela esidlala ngayo, akulangitsho loyedwa wethu kubasekeli oyikhwabithayo.”
Umdlalo obesenkundleni yeWhite City ngempelaviki edluleyo kumdlalo wenkezo kazibuse, yiwo okuvuse ulaka lukaMubaiwa lapho iDynamos idliwa 2-0 yiFC Platinum.
“Kulandela ukubuya komqeqetshi uPaulo Silva, iDeMbare idlala ibhola phose elifana lelezikwakweni kodwa ngabadlali abake babalodumo ngesikhathi sikaPasuwa labanye abaqeqetshi abeza emva kwakhe.
“Umqeqetshi lo uyakubona mgceke ukuthi ngempela iqembu alenzi kuhle njalo lesithupha sakhe silenge ngomnxeba kulandela ukuthi kulisizini ithimu yethu isidlale imidlalo yeligi emibili ingahlohli, yadlala lemidlalo yeIndependence Cup emibili yehluleka khona ukulithela emambuleni,” nguMubaiwa lo.
UMthunywa ukhulume loSilva ongazange afihle ukuthi kagcinwanga kuhle kuDynamos.
Ubike ukuba kulohlupho kuqembu leli okumele lulungisiswe.
“IDeMbare kayilungisise indaba zayo ngoba leli liqembu elikhulu njalo elisekelwa kakhulu,” kubika uSilva.
“Okwami bekuyikuqeqetsha kodwa nginanzelele ukuthi kunengi okuhluphayo kulithimu.”
Uqhubekele phambili ebika ukuthi kusamele abuyele ayetshintsha amaqhinga akhe kodwa umbuzo okhona yikuthi yiwaphi amaqhinga ngoba otshintsha amaqhinga uyabe etshengisa ukuthi uvele ulawo.
“Iqembu leli kalilungisise okungahambi kuhle, ngikhuluma nje kulabadlali asebefuna ukukhula amakhanda okokuthi ngesikhathi silolonga umdlali uyabe ekhona ngesikhathi sokuzakuba ngumdlalo akasabonakali,” kuchaza uSilva.
Ngokutsho kukaSilva, nxa kungalandelwa akutshoyo kutsho ukuthi ekuqhatshweni kwakhe kwaba labanye abakhokheli ababengamfuni kungakho sebebhadala abadlali ukuthi bengenzi kuhle.
Iphephandaba likazulu lingene esitaladeni labuza abalandeli beDynamos koBulawayo ngombono wabo ngomqeqetshi.
“Thina njengabalandeli beDeMbare asiselani laye lumqeqetshi yikho ubona sizikhulumela labadlali bethu ngoba kuyibo abadlali abake basijabulisa eminyakeni.
“Pho kuyini okungabe sekutshintshile,” kukhwaza uTendai Mhizha ongumlandeli omkhulu waleliqembu.
USimba Runhare uthe kungaba linyathelo elihle ukuxotsha uSilva.
“Hayi, akulamqeqetshi weDynamos onjengalo. Ukunqotshwa kuyatholakala kodwa isiphatho sakhe singcolisa iqembu. Singaqhubeka laye singakhala isizini yonke.”
Omunye wenkokheli zeDeMbare kuqula labasekeli bakoBulawayo uthe isinqumo sokuxotsha umqeqetshi sesikhona njalo uzasuka kulithimu.
“Usehambile lo. USilva kaphelelwa yiviki le elapha,” kutsho uEnias Morowa oyinkokheli yequla labathandi beDeMbare kumhlubulo ongezansi yelizwe.
