uMthunywa
Ethel Ncube
IQEMBU leDupute Warriors elihlabela liseSouth Africa selithumele amazwi enduduzo emulini kanye lakubahlabeleli bonke be-rhumba kulandela ukudlula emhlabeni kukaMa Eli loMaviri abahlabeleli beqembu leNsimbi zeZhwane.
UMa Eli ogama lakhe lokuzalwa nguElvis Mathe kunye loMaviri ogama lakhe nguThembinkosi Mpofu badlule emhlabeni ngoMgqibelo kulandela ukuba kungozi yomgwaqo.
Umuyi u Elvis “MaEli” Mathe
UGreyton Ngqwele Tshuma olilunga leqembu leDupute Warriors wethule amazwi enduduzo la ngesikhathi exoxa loMthunywa ngeqembu lakhe eliding usekelo lukazulu ukuze likhule.
“Njengeqembu sithanda ukwethula amazwi endunduzo kumuli ye-rhumba ngemva kokulahlekelwa nguMa Eli loMaviri.
“Singabantwana beMatabeleland silahlekelwe kakhulu. Sithi labo abasesibhedlela uNkulunkulu angathi angangenela basile masinya,” kutsho uTshuma.
UTshuma uphinde wakhuthaza abalandeli bomculo wabo ukuthi bazame ngazo zonke indlela ukubanxusa emicimbini ukuze umculo wabo uphakanyiswe.
Iqembu leDupute Warriors elicula liseSouth Africa langena kundima le ngomnyaka ka-2014.
UTshuma uveze ukuthi njengabahlabeleli badinga usekelo.
Umuyi uMaviri
“Sifisa ukukhula kwezomculo saziwe endaweni ezinengi kungakho sicela uzulu asinxuse emicimbini ngoba yiyo yodwa indlela engenza saziwe.
“Silamadlalade athi Uqoph’ ukuqopha, Sasidleni indlebe, Vuma, Ingqobe, Zonelwa mvunye, Ingqalabutho, Umasilakudliwa, Inzalo le-single ethi Uthando lweqiniso.
“Ekuhlabeleni sesike sasebenza leDubia Masters.
“Sidinga ama-promoters labantu ukuba basixhase sizonandisa emicimbini yabo,” kubika uTshuma.
Uqhubekele phambili eveza ukuba abantu kumele baphathisane labahlabeleli.
“Ekuhlabeleni bunengi ubunzima esihlangana labo kodwa kumele siqinisele siqhubeke sisiya phambili. Sidinga ukusekelwa kakhulu ukuze sikhule,” kuphetha uTshuma.
