uMthunywa
YiNtatheli kaMthunywa
UMGCINISIHLALO weChippa United, uSiviwe “Chippa” Mpengesi, uxwayise iqembu lakhe ngobungozi bokumila impiko ngenxa yokunqoba i-Orlando Pirates nge1-0.
IChippa eqeqetshwa nguDaine Klate, owaduma kuPirates esengumdlali, itshiye kukhalwa e-Orlando Stadium.
Daine Klate
Konke bekuvuna iPirates kulumdlalo njengoba yakhe inqwaba yamathuba kodwa kwacina kube yizivakatshi ezisebenzise amathuba la.
UMpengesi ubengekho emdlalweni nanko ubesesontweni ngesikhathi kuqhubeka umdlalo, uphanyeke umyalezo nge-vidiyo, ekhasini laleli qembu leTwitter, lapho abonge khona kuMdali ngemiklomelo emithathu, wasetshiya umyalezo kubadlali bakhe.
“Indlela inhlelo zalumdlalo (wethu lePirates) ebezihamba kahle ngayo, angizange ngisibone isidingo sokuya enkundleni kodwa ngakhetha ukuyakhuluma ngezwi leNkosi ngoba ngethemba uMdali,” kutsho uMpengesi.
“Ngijabule ngokuthi imithandazo yami iphenduliwe sanqoba kodwa lokhu akutsho ukuthi abadlali sebeqedile. Kuhle ukunqoba kuPirates kodwa lokhu akufanelanga kusibuse amakhanda.
“Manje sekuyisikhathi sokuthi iChippa ikwenze isiko ukunqoba imidlalo. Ngeke kusijabulise ukunqoba ngale indlela bese siyatshaywa emidlalweni emihlanu elandelayo.
Isikhathi sokuthi iChippa ikhule labadlali batshengise ukuthi badlala esigabeni esikhulu sebhola lase-Ningizimu Afrika, yisona lesi.
Uqhubeke wathi: “Ngiyathemba ukuthi ukunqoba kuPirates kuzabakhuthaza ukuthi baphume ngobunengi babo bezosibukela le-TS Galaxy emdlalweni wethu olandelayo ekhaya,” kutsho uMpengesi.
Umdlalo weChippa leTs Galaxy uzabe useNelson Mandela Bay Stadium mhlaka 24 Ncwabakazi.
