uMthunywa
Nkosilathi Sibanda
UMQEQETSHI weChicken Inn uJoey Antipas ulakho ukutshiya leliqembu ngoNtulikazi nanko usekhonjiswe liqembu leSouth Africa iAmaZulu elibika ukuthi lizimisele ukukhipha izigidi zamarandi ukuze lithole lumqeqetshi.
Inkokheli zeAmaZulu FC zibika ngokugcweleyo ukuthi ngesizini ezayo zizaxotsha uSteve Barker ngoba zikhangelele ukuthi zithole uAntipas ngokuphangisa.
Ngokuzwa kwephephandaba likazulu, abaphathi beAmaZulu sebeqalile ukukhulumisana loAntipas.
Ukukhonjiswa kukaAntipas kuza ngesikhathi iChicken Inn ibike ukuba izalahlekelwa ngabadlali bayo abambalwa besiya kuligi yeAbsa eSouth Africa ngoNtulikazi. Abadlali laba nguMitchel Katsvairo, uEdmore Chirambadare, unozinti uElvis Chipezeze loLawrence Mhlanga.Umfakazi oqotho oseqenjini leChicken Inn uthe kumaviki amabili alandelayo kulenkokheli zeAmaZulu ezizafika kuleli zizoxoxisana loAntipas.
“Umqeqetshi wethu (uAntipas) kungenzeka ayesebenza eSouth Africa kuqembu leAmaZulu. Umbiko esilawo yikuthi inkokheli zaleliqembu zizavakatshela amahofisi eChicken Inn zilande ukuzoncenga umqeqetshi lo,” kutsho umfakazi lo owale ukuqanjwa ngegama, osebenzela iChicken Inn ehofisini ephezulu.
“Kungenzeka ukuthi uAntipas avume ngoba kuvezwe ukuthi iAmaZulu izimisele ukwehlukana lemali enengi ibhadala umqeqetshi lo.
Isikhulumi seqembu leAmaZulu, uBrilliant Mkhathini, ubike ngokufihla ukuthi baphakathi kwengxoxo loAntipas.
Uthe angeke akhiphe okunengi kumaphephandaba.
“Njengamanje akulanto esiphumile ngaloludaba. Leyo yinkulumo yamaphephandaba. Ngeke ngivume kumbe ngiphike ukuthi abaphathi bakhuluma lomqeqetshi lo,” kutsho uMkhabathini ebulenjini beAmaZulu.
“Engikwaziyo yikuthi zikhona izicelo ezifakiweyo. Engilesiqiniseko lakho yikuthi uhlelo esilalo yikukhangelana lemidlalo emihlanu eseleyo.”
UMthunywa uxhumane loAntipas othe udaba lolu uyaqala ukuluzwa kuntatheli.
“Nxa kunjalo kutsho ukuthi ngiyaqala ukuzwa lokhu. Ngisesengumqeqetshi weChicken Inn ngokugcweleyo isizini ize iyephela.”
Esikhathini esincane engumqeqetshi, uAntipas usenqobe izicoco ezimbili kuligi yakuleli. Ngesizini ka-2010 udle zonke kuligi eqeqetsha iMotor Action. Nyakenye uphakamise isococo seCastle Premiership leChicken Inn.
Ukuze athandwe ngamathimu aseSouth Africa, uAntipas wabonakala kumkhankaso weCaf Champions League.
Kulumkhankaso, iChicken Inn yakhitshwa yiMamelodi Sundowns. Kumidlalo emibili phakathi kwamaqembu la, iChicken Inn yatshengisa ukuthi iliqembu okungamelanga lithathwe kancane.
UAntipas watshaya iSundowns nge 1-0 kuhlandla lakuqala. AmaBrazillians aphindisela nge-2-0 kwelesibili.
UAntipas uzitshaya isifuba ngokusebenza ngcono labadlali abangakazakheli igama kunguqu yeZimbabwe, okuyikhona okwenza kukholakale ukuthi angangena khaxa ku-Amazulu.
I-AmaZulu itshibilikela kuligi yeNational First Division kodwa ibalelwa kumathimu alemali eSouth Africa.
