uMthunywa
YiNtatheli kaMthunywa
ABASEKELI beqembu lezwe lonke iHighlanders bathe le yisizini yabo yokukholisa njalo bathemba ukuthi iqembu leChapungu alisoke libanqobe mhla zidibana kulimpelaviki enkundleni yeAscot eGweru.
IChapungu seyanqoba iHighlanders kanye kuphela kusukela ngo2014.
Okuzakhweza idlabuzane labadlali bakaMantengwane labalandeli babo yikuthi iHighlanders indiza phezulu kwelogu okwamanje. IChapungu ithe ngqe emsileni welogu.
NgoMgqibelo kudibana amathimu la, eyodwa iphezulu eyinye isadalala ekucineni kwengalane.
Osabambe isikhundla sikamgcinisihlalo weHighlanders uModern “Voltage” Ngwenya ucele abalandeli babo ukuthi bangene umango ngokuthula bayesekela abadlali eAscot. Ubike ukuthi balethemba lokuthi iqembu labo lizanqoba liyangise iChapungu njengalokhu abakwenza kwamanye amathimu kulezinsuku.
“Sikhangelele ukuyitshaya iChapungu. Bazadana abadlali balithimu ngakho kumele lathi sibaphinde futhi.
UNgwenya labanye bakhe kubukhokheli beBosso bathe kuyisifiso sabo ukuthi wonke amaqembu abazahlangana lawo aphaphame kancane.
Omunye umsekeli weHighlanders owaziwa ngokuthi nguTeekay ubikele iphephandaba likazulu ukuthi iChapungu ingabe iphupha nxa icabanga ukuba ingabanqoba.
“Iyafisa iChapungu. Angeke kwenzakale ukuthi iHighlanders inqotshwe liqembu elisemsileni welogu. Sizayilandela ithimu ukuze siyikhuze inqobe. Amaqembu afana leChapungu la kumele atshaywe okuzwayo. Ithimu yethu layo kumele iqale ukutshengisa ukuthi iyafuna ukuba yintshantshu,” nguTeekay lo.
Phezulu kwalokhu, abasekeli laba sebezimisele ukusekela umqeqetshi wabo uErol Akbay labadlali abatsha abaphuma kwamanye amazwe uManuel Obiang Esono Baule oweEquitorial Guinea, uTambwe Kalunga loYves Ebabali abeDemocratic Republic of Congo.
“Thina njengabasekeli beqembu siyajabula ngomsebenzi oqhutshwa nguAkabay. Nxa ezadlalisa labafana abatsha, siyakwamukela. Izitha zethu zizabona izibunu zenyoka,” kutsho uTeekay.
Ubike njalo ukuba abalandeli labo kumele bafunde kuzibamba enkundleni loba iqembu linqotshwa.
“Ubumbulu asibufuni enkundleni. Lapha ngitsho ukuba lathi abasekeli sifunde ukuzibamba ngaso sonke isikhathi ukwenzela ukuthi iqembu lingajeziswa imali ngokuziphatha kwethu enkundleni.”
Nansi imidlalo kulimpelaviki:
Chapungu v Highlander (Ascot), Tsholotsho v Harare City (Dulivhadzimo), Bantu Rovers v Yadah (Luveve), Chicken Inn v How Mine (Luveve), ZPC Kariba v Bulawayo City (Nyamhunga), Ngezi Platinum Stars v Shabanie (Baobab), Triangle v Black Rhinos (Gibbo)
