uMthunywa
YiNtatheli kaMthunywa
KULANDELA ukufa kwabasekeli beHighlanders kungozi yomgwaqo Esigodini, iqembu leli selelule izandla lancedisa imuli ezalahlakelwayo.
Abasekeli laba bafa mhla womdlalo weHighlanders leDynamos eBarbourfields. Kulumdlalo iBosso yanqoba 2-1, okwenza abalandeli bayo bajabula ngendlela engakaze ibonakale ngoba kunqotshwe ithimu eyayihlezi inqoba ithimu yezwe lonke okwesikhathi eside.
UNdumiso Gumede umaqhuzu weHighlanders ubike ukuba badabukile ngengozi eyathatha imiphefumulo yabasekeli babo njalo bakubone kufanele ukuthi baphathise izimuli zabasekeli laba.
Intatheli yephephandaba likazulu ixhumane loGumede ochaze ukuthi balusizi ngalokhu okwehlele abalandeli babo kukanti bakhala ndawonye lemuli ezitshiywe yizihlobo.
“Silusizi kakhulu ngesehlakalo esehlele abanye bethu. Lathi sikhala lalabo abatshiywe yizihlobo ngoba lathi njengeqembu siyizihlobo kibo.
“Ngikhuluma nje kulomunye wethu ositshiyileyo engozini uLearnard Sanudi, badlule laye kithi ngesikhathi sebesiyambeka endlini yakhe yokuphumula. Iqembu lincedise ngamafutha okuhambisa imota sebesiya ekhaya,” kuchaza uGumede.
Uqhubekele phambili esethula ukuthi kulomunye umama uSimeleni Mpofu owalimala engozini le olaliswe esibhedlela ophathiswa liqembu leBosso.
Kuzwakele ukuthi iqembu lithumele abantu ukuthi bayevakatshela umama lo olimeleyo esibhedlela seUnited Bulawayo Hospital (UBH) owasinda engozini le.
Abanye abalandeli beBosso baphathisile emngcwabeni wabanye babo njalo bathembisa ukuthi bazaqhubeka bekwenza lokhu.
“Abafowethu abatshonileyo sizahlala njalo sibakhumbula. Lokhu kungenxa yokuthi besimuli yinye ngoba sonke singabalandeli beqembu eliligugu likaMthwakazi,” kutsho omunye wabalandeli othande ukwaziwa ngokuthi nguMbongeni.
Kukhanya sokuyimvama kwelakithi ukuthi nxa abalandeli bephuma esitediyamu kube lengozi. Nanku phela lonyaka njalo iqembu leDynamos latshonelwa ngabalandeli.
Kuyinkuthazo kubo bonke abalandeli bamaqembu ukuthi nxa omunye wabo etshonile baphathise imuli elahlekelweyo.
