uMthunywa
Nkosilathi Sibanda
AMATHIMU amathathu angaphansi kweHighlanders abhekisa amabombo esabelweni seMatabeleland South lapho anxuswe ukuthi azotshengisa izakhamizi zakoGodlwayo ukuthi inguqu idlalwa njani kulimpelaviki.
Abafana abagijimela ithimu yabasakhulayo kulokitshi leBosso bazabumba amathimu amabili azabambisana indlela lequla labadala abake badla ubhedu besadlalela iBosso kudala kwabo. Amathimu la azaphatheka kumkhosi wokubukisa inguqu enkundleni yesikolo seVokola esiqintini seNsiza.
UNkululeko Tshuma isikhulumi semidlalo le, omele iligi yakoGodlwayo ubikele iphephandaba likazulu ngoLwesine ukuthi bacele iHighlanders ukuthi ithumele amathimu amathathu azatshikilisana labafana bakulindawo.
“Siyajabula ukubika kuzulu ukuthi ithimu yezwe lonke iHighlanders isivumile ukuthumela abadlali bayo ukuthi bezokhaba ibhola lamathimu asemaphandleni emangweni wakoGodlwayo. Iligi yakoGodlwayo ilamaqembu alitshumi lambili njalo sifuna ukwakha ubudlelwano leBosso ukuze abafana bakithi bakhwabithe ukudlalela amathimu amakhulu kuleli.
“IHighlanders sikhangelele ukuthi ize lethimu yalabo abake bayidlalela. Abadlali abadala laba bazadibana labadala benguqu abaphuma koGodlwayo. Amathimu amabili azaqoqwa kukolitshi labadlali abasakhulayo kuHighlanders njalo yiwo amathimu la azadibana labafana abasacathula koGodlwayo. Okuqakathekileyo ngemidlalo le yikwakha ubudlelwano lokutshengisa ithalenta esilalo emaphandleni,” kutsho u Tshuma.
Umgcinisihlalo wenguqu yakoGodlwayo uNorman Sibanda utshele uMthunywa ukuthi imidlalo yabo leBosso izaqhutshwa minyaka yonke ngoNhlolanja ngoba kuyisifiso sabo sokuthi basondelele ingqwele zenguqu koBulawayo.
UTshuma uthe bathole usekelo lwemali kuzakhamizi zakoGodlwayo, okuyizo ezithe kumele kunxuswe iBosso ngoba yiyo ithimu elabalandeli abanengi kulumango.
Kusenjalo, umaqhuzu weBosso uNdumiso Gumede ubike ukuba bayakuthakazelela ukunxuswa emaphandleni ngoba kutsho ukuthi ithimu yabo ilosekelo olungelamkhawulo.
“Umkhosi onjengalo uyisiboniso sokuthi iHighlanders ayisoze ibulawe. Usekelo esilalo lwenza kubelula kubaqeqetshi bethu bama-juniors ukuthi bacuphe ithalenta elingaziwayo emaphandleni. Imidlalo le izanikeza njalo abafana bethu isikhathi sokuthi bancintise, bajulisise ubungcitshi babo anduba isizini iqalise.”
