uMthunywa
. . . YIBUNANDI E-BF
NguNkosilathi Sibanda
INKEZO yeBob91 izadlalwa kulimpelaviki loba iHighlanders ike yabika ukuthi kayisoze iphatheke kiyo ngoba ilohambo lokuya eBeitbridge.
IBosso idibana leCaps United enkundleni yeBarbourfields kuhlandla lama-semi-final alinkezo yokuthakazelela ilanga lokuzalwa kukaMongameli uRobert Mugabe.
Omunye wabaqoqi benkezo le, uStan Kasukuwere ubike ukuba iHighlanders izadlala kunkezo le ngoba umdlalo lo ungomunye wemidlalo eqakathekileyo kuleli.
“Umdlalo weHighlanders leCaps United uyaqhubeka njengokubika kwethu phambilini. Inkezo le yasungulwa ukuze ihlanganise abantu bakithi. UMongameli wethu useleminyaka engu-91 okutsho ukuthi kumele sijabule laye.
“Imvuzo yemali ikhona njalo lamathimu azalungiselwa impahla yokugqoka, kubhadalwe lamahotela kanye lezimota zokuthwala abadlali,” kutsho uKasukuwere ngoLwesithathu emini.
UMthunywa ukhulume lomaqhuzu weHighlanders uNdumiso Gumede andubana athole udletshana lokuthi iBob91 izaqhubeka.
UGumede ubethe iTshilamoya ayisoze idlale leCaps United ngoba kumele iphatheke kumcimbi weBorder Strikers edolobheni leBeitbridge.
“Asali ukudlala kodwa baphuzile ukusitshela”.
UKasukuwere uthe inyathelo leHighlanders lokuya eBeitbridge alisebenzi ngoba i-Bob91 luhlelo lukaHulumende.
“Inkezo le ngekaHulumende. IHighlanders izathi ilomthwalo wuphi ngokwekela ukudlala. Abalandeli benguqu abaze ngobunengi babo eBarbourfields.”
IBosso idibana leMakepekepe kuhlandla lama-semi-finals kudingwa ithimu ezadibana leDynamos, ingqwele zalinkezo ngomnyaka ka2014. Inkezo yeBob 91 isidlalwe okweminyaka emihlanu njalo yiyo esivule isizini kumathimu la womathathu.
Imbali iveza ukuthi iDynamos yiyo esibuse kakhulu kulinkezo kumasizini adluleyo.
