Ibhola lizadlalwa kodwa ….

17 Sep, 2020 - 00:09 0 Views
Ibhola lizadlalwa kodwa …. Kirsty Coventry

uMthunywa

YiNtatheli kaMthunywa
ABATHANDI labalandeli bebhola likanobhutshuzwayo bazathola injabulo ngokuzwa ukuthi umdlalo usuvunyelwe.
Umphathintambo wezemidlalo kuHulumende uKirsty Coventry uthe ukuze asuthiseke ukuthi avumele ukuvulwa kwenkundla, iZIFA kumele iqale ngokulandela uhlelo lwe-Bio Bubble.

I-Bio Bubble le yindawo evikelekileyo evalela ukuphila kwegcikwane njalo izabe ingenwa ngabadlali, abaqeqetshi lezinye izisebenzi zomdlalo. Akulamuntu ovunyelwa ukuphuma ku-Bio Bubble kuze kuphele imidlalo yonke.

Inguqu yeSouth Africa isebenzise loluhlelo yaphetha isizini kungela obanjwe yiCovid-19.

Ekhuluma lentatheli, uCoventry uthe akula ngenye indlela angavumela ukuthi inguqu iqalise nxa kungela Bio Bubble.

“Inguqu ngumdlalo olakho ukumemethekisa igcikwane ngakho kumele siqaphele. Siphume lenyathelo esilinikeze Izifa. Inyathelo leli ligxile ku-bio bubble esiyibone isetshenziswa emazweni abalisa iSouth Africa, iMelika laseNgilandi. Isetshenzisiwe njalo lakumidlalo yeNBA. Kodwa lokhu kumele kuhlolisiswe zingcitshi,” kutshio uCoventry.

Kusenjalo, Ekhuluma loMthunywa ngoLwesithathu umongameli weZifa uFelton Kamambo uthe bayalamukela inyathelo likaHulumende.

“Kuyajabulisa sibili ukuthi sesizaphenduka kunguqu yethu. Ibhodi yethu izakhangelisisa inyathelo leli.”

Kumaviki amabili edluleyo uKamambo watshela intatheli le ukuba baphakathi kwamalungiselo okuthi ibhola libukelwe kumabonakude mhla isizini ivulwa.

IZifa yathi inyathelo leli lizaphathisa njalo lamaqembu adlala kuligi yeCastle Lager Premiership.

UKamambo wathi kungumbono wabo ukuthi balandele okwenziwa ngamanye amaligi aqakathekise ukusakazwa kwemidlalo kumabonakude , njengoba kungavunyelwa ababukeli enkundleni.

Share This:

Sponsored Links