uMthunywa
Buhlebenkosi Gaule
INHLANGANISO yePoultry, Mushroom, Rabbits kanye leGardening (PMRG) isikhuthaze uzulu wonke olesifiso sokuqala ibhizimusi ukuba angene kweyokufuya imvundla ngoba ilenzuzo ephezulu.
Inhlanganiso yePMRG eselokitshini leLuveve yabunjwa yizakhamuzi zeLuveve, Lobhengula leMagwegwe njalo ikhuthaza lentsha ukuthi iphatheke ikakhulu kubhizimusi yokufuya imvundla ngoba ilakho ukubalethela imali.
Inhlanganiso le iqale ukufuya imvundla nyakenye njalo ilamalunga angu-68.
UNkosazana Celani Muungani onguMgcinisihlalo wePMRG uthe iqembu lakhe lakhetha ukufuya imvundla ngoba lilenjongo yokuthengisela abantu, abamabhutsha lendawo okuphekwa khona ukudla.
“Imvundla esiyifuyayo kasidubeki ngitsho ukuyithengisa ngoba ithengwa ngabantu, abapheka ukudla, abamabhutsha njalo sikhangelele ukuthi ngesikhathi esizayo sibe sesiyithengisa ngaphandle kwelizwe.
“Sathi siqala ukufuya imvundla le kwaba lenye ibhutsha eyathi ifuna imvundla yonke esasilayo yikho okwasipha intshukuntshu yokuqhubekela phambili siyifuya yikho nje sisithi amathuba amabhizimusi ekufuyeni imvundla akhona,” kutsho uNkkz Muungani.
UNkszn Muungani uthe abalesifiso sokufuya imvundla balakho ukuyadinga ulwazi olugcweleyo kwabeRabbit Association.
“Amaqembu loba abantu abafisa ukufuya kumbe abalesifiso sokufuya imvundla balakho ukuthola ulwazi kwabeRabbit Association etholakala khonapha koBulawayo” kutsho uNkszn Muungani.
Uphethe ngokuthi inhlanganiso yabo iyancedisa labo abafuye imvundla ngokubadingela lapho abangayithengisela khona kanye lokulayela labo abayifunayo.