uMthunywa
YiNtatheli kaMthunywa
IQEMBU labomama bomdlalo wokudonselana intambo kukhansili yakoBulawayo eleBCC Ladies selifunge ukuthi yilo elizaphakamisa inkezo yalonyaka eyeNgwebu Tug-of-war encintiselwa enkundleni yeZimbabwe International Trade Fair ngoMgqibelo.
Intshukutshu le iphuma kulandela umbiko wokuthi inkampani yeNgwebu ikhweze inani lomvuzo ozaphiwa iqembu elizanqoba wonke kulumncintiswano.
Ithimu yeBCC Ladies le yaphuma iyintshantshu ngomnyaka ka-2016.
Lonyaka iNgwebu ibike ukuba omama abazanqoba bazaphiwa i$800. Iqembu elizakuba ngelesibili lizanikezwa i$600, elesithathu lithole i$400.
IBCC Ladies izakuba ngelinye lamaqembu edlula amatshumi amathathu aphuma kuzabelo zonke zelizwe azadibana enkundleni yeZITF grounds ethokozisa uzulu ngosuku lokucina kumkhosi we-Trade Fair.
Isikhulumi seBCC Ladies, uSamu Dladla ubikele uMthunywa ngoLwesibili ukuba abadlali babo sebekhuthazwe yibunengi bemali ukuthi badlale ngokuzimisela.
UDladla ukhulume lokhu ngesikhathi iqembu lilungiselela umncintiswano lo kweyinye inkundla koNtuthu.
“Silokuthaba ngokuthola umbiko wokuthi omama sebethole ukuhlonitshwa kwezemidlalo. Ukukhwezwa komvuzo kutshengisa ukuthi umdlalo we-Tug-of-War uyaphambili kumaqembu abomama,” kutsho uDladla.
UDladla uthe umdlalo wabomama ulokhe ukhula nanko phela sekulamaqembu amanengi kuzabelo zonke akhwabitha lumdlalo. Uthe kuyisifiso sabo ukuba omama bathole usekelo lwemali kumankampani labosomabhizimusi.
“Sifisa ukuthi umdlalo wethu weTug-of-War uqale uhlelo lokulolonga abasakhulayo, njengalokhu okwenziwa kweminye imidlalo.
“Sikhankasela ukuphakamisa abantwana abangamankazana ukuze babelethuba lokuziphilisa lokugcina imizimba yabo. Sibonga kakhulu usekelo lweNgwebu Breweries,” nguDladla lo.
Lokhe kwasungulwa inkezo yeNgwebu embukisweni weZITF, sekunqobe amaqembu akumhlubulo ongezansi yelizwe.
Iphephandaba likazulu kuliviki libukele amathimu la elungiselela umcimbi lo wokudonselana intambo, osusiba ngumncintiswano othandwa linengi lalabo abajwayele ukuwubukela ngesikhathi sombukiso wamabhizimusi koBulawayo.
Isikhulumi seZimbabwe Tug-of-War Federation uSamkeliso Dlala ubikele uMthunywa ukuthi phose wonke amathimu aselungiselele aphelela ukuthokozisa uzulu mhla welanga lomncintiswano.
“Siyathaba ukubika ukuthi amathimu azaphatheka kumncintiswano walonyaka oweZITF Tug-of-War asezimisele ukuthi ayencintisana,” kutsho uDladla.
Uthe kuyisifiso sabo ukuthi lonyaka kunqobe amathimu akoBulawayo ikakhulu kuhlandla labomama.
“Kungabakuhle ukuthi omama bakoBulawayo batshengisele ukuthi bayawazi umdlalo lo ngokunqoba ngoMgqibelo. Kade omama bakhengelelwa phansi kulumdlalo kodwa kuminyaka emithathu edluleyo, sekusaziwa ukuthi amaqembu abomama ayadonsa intambo njengabobaba.”
Iqembu lekhansili yakoBulawayo lona likhanya lilamathuba amahle okuhluthuna umvuzo kulo umncintiswano nanko phela selike ladlala kuhle emncintiswaneni oke waphathwa esikolo seSizane kumaviki adluleyo.
Kusenjalo, lonyaka kubikwa umvuzo wemali uphezulu kumdlalo wokudonselana wabobaba.
Ingwebu Breweries ithembisa ukunikeza iqembu elizanqoba i$1 600, kubikwa abanqobi bazanikezwa i$1 100, abalandelayo baphiwa i$650. Abaqoqi bomncintiswano bathe bazanikeza njalo inkalakatha yethanka lamasese elingamalitha angu-1 000 lezikipa.
Imidlalo yakuqala izakuba khona ngehola lika-8 ekuseni esikolo seGifford kuthi emini kube lama-quarter final lamanye amahlandla.
Amaqembu andise ukuhlupha aze ayefika kuma-final abalisa iHow Mine, iZiscosteel, Ingwebu, leMutare Board and Timber.
