uMthunywa
YiNtatheli KaMthunywa
ILIGI yomdlalo kanobhutshuzwayo esabelweni seMatabeleland North, iNyathi Football Association (iNyafa), isibike ukuba ilakho ukuba lethimu engadlala kuPSL kumasizini ambalwa alandelayo.
Lokhu kuza ngemva kokuba umaqhuzu weHighlanders uNdumiso Gumede ekhuthaze izakhamizi zakulindawo ukuthi zibumbe ithimu ezamela indawo le.
UGumede laye yisakhamuzi seNyathi njalo inkuthazo yakhe wayiqala kuminyaka emibili edluleyo ngesikhathi esasengumsekeli kamongameli weZimbabwe Football Association.
Ekhuluma loMthunywa uGumede uthe ngendlela umdlalo oguquka ngayo, akusoze kumangalise ukuthi kube leyinye ithimu ephuma emaphandleni edlala kunkezo yePSL.
Lonyaka lokhu kubonakale ngokuphakama kweTsholotsho FC ingena kuligi yePSL.
UGumede welule ukuba ukuswelakala kwamathimu emaphandleni kumaligi amakhulu elizweni sekudale ukuthi abadlali abanengi badlalise ithalenta.
“Lokhe ngangena kunguqu, sengibone amathalenta amanengi ephuma emakhaya. Lakithi eNyathi kulabafana abanengi abalakho ukuhlangana babumbe ithimu ezwayo.
“Ngikhuthaza izakhamizi kanye lenhlanganiso eziphethe umdlalo emaphandleni ukuthi ziqale khathesi ukwakha amaqembu. Umdlalo wethu uyatshintsha ngakho akwethusi ukuzwa ngethimu evela eNyathi loba kwezinye indawo ezisemaphandleni edlala kuPSL. Angithi lami ngadla ubhedu nje ngidabuka emaphandleni,” nguGumede lo.
Ngokuzwa amazwi la, iziphathamandla zenguqu eNyathi zibambene lamathimu edlula itshumi lasithupha avumelane ukuthi kwakhiwe iqembu elikhulu masinyane.
Babikele iphephandaba likazulu ukuba sebebophe iqhinga lokuthi kusiyafika isizini ka2018, kube sekulethimu enkulu edabuka eNyathi.
Isigaba lesi saziwa kakhulu kwezenguqu ngoba yikho lapho okuphuma khona ithimu yeTurk Mine edlala kumaligi eZifa kanye labosaziwayo bomdlalo ababalisa uGumede owake wadla ubhedu kuHighlanders, uThamsanqa Vundla loNdumiso Mhlanga owayekuLengthens.
Iligi yeNyafa ilamaqembu alitshumi abalisa iBlack Swallows, iNyathi Hospital, Mahlabathini, Nyathi Rovers, Real United, Ndumba FC, Red Devils, Bambanani, Golden Lions leBadala FC.
Kubikwa kumasizini adluleyo amathimu la ayemanengi esedlula i18, kodwa ngenxa yokuthi abadlali bahugwa ludumo lweGoli, amanye amaqembu asuka adilika.
Abanye abadlali kuzwakala ukuthi sebongomakorokoza ngoba inguqu yeNyathi ayilamali.
Omunye weziphathamandla zeNyafa uDanford Ncube uveze ukuba asidlabuzane eliseNyathi ngemva kokuzimisela kweligi yabo ukuthi kube lethimu ekhuphuka isiya kuPSL.
UNcube uthe okwamanje inguqu loba ingelamali ecacayo, ikusasa labo liyakhanya.
“Lonyaka siguqula izinto kunguqu yeNyathi. Ngemva kokunanzelela ukuthi silakho ukuba lethimu engaya kuPSL.”
