uMthunywa
YiNtatheli kaMthunywa
ABADLALI bamaqembu e-pool esigabeni seHwange bazatshengisela ithalenta labo ngokuncintisana kumidlalo ezaqhutshwa ngekhefu lePhasika enkundleni yeGVZ.
Amaqembu afika itshumi akhangelelwe ukuthi athumele abadlali kulumncintiswano ozavula isizini yokudlala i-pool ngezinga laphezulu emangweni weHwange.
Umdlalo we-pool ubuthathelwa phansi kulindawo njalo inengi labadlali belingazi ukuthi umdlalo lo usuqakathekiswa kwezinye indawo. Ngenxa yalokhu abaqoqi bomncintiswano wangempelaviki lo bathe sebefuna ukuvuselela i-pool esigabeni seHwange ukuze abadlali bathole ukuphakamisa impilo zabo.
Isikhulumi sabaqoqi balumncintiswano uFikile Maligo uthe abadlali abanxusiweyo bazavela kumaqembu aphuma edolobheni leHwange lasemaphandleni aseduzane lapho okulosekelo lomdlalo we-pool. Amanye amathimu azavela eFolosi laseDete.
“Umdlalo we-pool usukhula ngamandla lapha eHwange. Asikhulumi ngokwenzakala edolobheni kuphela kodwa lakundawo ezisemaphandleni. Ukwanda kosekelo kulumdlalo usifuqe ukuthi siqoqe umncintiswano lo ozadlalwa ngoMgqibelo enkundleni yeGVZ.”
Phakathi kwamathimu akhangelelwe ukuncintisa, kulabadlali ababili abalakho ukubaleka lomvuzo wakuqala.
Intshantshu ze-pool esabelweni seMatabeleland North uWellington Chiweshe loEddington Mukuwa zizangqikilana okuzwayo lentshantshu zeFolosi uBatsirai Chikonyera loCliff Mautsi.
Umaqhuzu weGVZ Leisure uKenneth Chiwanza uthe injongo yokuvuselela i-pool enkundleni yabo ivela ekuthi bafuna ukusekela ezemidlalo esigabeni seHwange.
Kumasizini amathathu adluleyo umdlalo we-pool esabelweni seMatabeleland North wavuselelwa yinkezo yeCarling Black Label encintiswa yizabelo zonke.
Amadolobho eHwange leFolosi yiwo akhanya elamathimu alabadlali abazimisele ukuphakamisa impilo zabo ngokuphatheka kulumdlalo.
Inhlelo zokuvuselela imidlalo emaphandleni iyigxenye yezeluleko ezaphawulwa ngumphathintambo wezemidlalo uMakhosini Hlongwane okhankasela ukuthi ezemidlalo zisetshenziswe ukuguqula impilo zabantu.
