uMthunywa
Joel Ndlovu
BEKUNGABIZWA ozwayo kugujwa ilanga lapho ibandla leHouse of Incense International Church elasungulwa khona kumaviki amabili edluleyo.
Umphurofethi Harry Matavire owasungula ibandla leli njalo owenza umsebenzi weNkosi ebambisane lo Mvangeli u-Everstone Conjwayo uthe bekulilanga eliyisibusiso kumalunga ebandla lakhe ngoba kunengi osokwenzakele kulelibandla osokwenze abantu bakhula kwezomoya kuthi impilo zabanengi lazo zathintwa njalo zaguqulwa ngendlela emangalisayo.
“Abantu baze ngobunengi babo bezodumisa iNkosi behlanganyele lathi sikhumbula usuku ibandla lethu elasungulwa ngalo.”
“Abafundisi abagoqela uMnumzana Owen loAnna Madori abavela ebandleni le Grace House International babusise abantu ngelizwi leNkosi eliguqulayo,” kulandisa uMphurofethi uMatavire.
UMphurofethi uMatavire uthe usuku lwesikhumbuzo lolu lumkhumbuza indlela abaqala ngayo ibandla.
“Sasibalutshwane kakhulu ngoba sasiqala ukuvula ibandla lisaselincane. Khathesi siyibonga kakhulu iNkosi ngoba bazile abantu ngobunengi babo njalo basibonisa uthando, lokhu yisimanga esihle kakhulu”.
“Kwenzakala izimanga ezinengi kakhulu kumhlangano lo, nanko phela akade belemikhuhlane etshiyeneyo egoqela imvukuzane basilile. Yimisebenzi emihle eyenziwa nguThixo le,” kutsho uMphurofethi uMatavire.
Umphurofethi lo uphethe ngokuthi ibizo lebandla leli lavela ebhayibhilini ebhukwini lika Psalms 141 kusiya ku 142 inhloso kuyikuthi isizwe silungiselele ukuza kweNkosi uJesu kwesibili.
