uMthunywa
AKUVAMANGA ukuthi uthole iqembu labesintwana elenza kuhle okwesikhathi eside. Amaqembu amanengi ayaduma aphinde abhuluke. Kuliviki sihlangana leqembu elibizwa ngokuthi yiDigital Queens, elasungulwa ngomnyaka ka 2010 kodwa lamuhla lokhu liqinile njalo lithembisa izimanga. Zwana okunengi ngeqembu leli kungxoxo elandelayo phakathi kukaSamkelo Tshuma lowalisungulayo uNonhlanhla Dube.
ST: Akusithi fahla ngembali yakho?
ND: Ibizo lami nguChinyaradzo Nonhlanhla Dube, abantu bangazi ngokuthi Nonhlanhla. Ngazalwa ngomnyaka ka 1989, ekhaya kuseGokwe.
ST: Wafunda ngaphi?
ND: Ngafunda eSacred Heart imfundo yami yaphansi, ngafunda uFomu 1 lo2 eKana High eGokwe, ngasengiqedisa eSobukhazi koBulawayo.
ST: Sitshele ngembali yeqembu lenu, kuyini iDigital Queens njalo lidume ngani?
ND: Leli liqembu labesintwana abalitshumi. Iqembu leli lasungulwa ngo 2010 kodwa ngaleso sikhathi sasisebenzisa ibizo elithi Afro-Queens kwaya ngesikhathi satshintsha ngomnyaka ophelileyo sasebenzisa uDigital Queens. Sigida umhlobo weRhumba, Sungura kunye le-Hip-Hop kodwa sandise ukugida lokhu okufunwa ngumphakathi.
ST: Lahlangana ngaphi lamanye amalunga eqembu?
ND: Ngangikumcimbi weBumba Festival yikho lapho engahlangana labo khona.
ST: Kungani lasebenzisa ibizo elithi Digital Queens, lalikhetha njani lelogama?
ND: Satshintsha igama leqembu ngoba iAfro Queens kwakulibizo esasiliphiwe hatshi igama esasizikhethele lona. Sasesinquma ukuthi sibizwe Digital Queens ngoba sananzelela ukuba sesiphila esikhathini lapho izinto esizisebenzisa izinto zi-digital. Yikho nje sazipha ibizo leli.
ST: Waqala nini ukujabulela ezomgido?
ND: Abadala bathi ikhula lamanono ayo kungakho lami ngathanda ezokugida ngisesemncane njalo lesikolo kwakusithi kungaba lomcimbi ngangivame ukugida.
ST: Ngubani owakukhuthaza ukuqala iqembu?
ND: Angeke ngithi kulomuntu owangenza ngaqala iqembu lami ngoba kwakuyisifiso sami ukuthi ngelinye ilanga ngibe leqembu. Ngakho ngalisungula leliqembu kukanti uPhilip Gadluma yena wangisekela kusinqumo lesi.
ST: Selike laphatheka emcimbini omkhulu?
ND: Yebo, sike saphatheka emcimbini emkhulu ngomnyaka ophelileyo kuze kubuye umhlabeleli olodumo uFreddy Gwala eMakhosi Theatre kunye le Gibo Stadium esadlala khona lomuyi uTongai Moyo ngo 2013 kulama sugarcane celebrations.
ST: Lidlala kuyiphi imicimbi kulezinsuku?
ND: Siyanxuswa ukuthi siyedlala emitshadweni, emadilini kunye lakuma-clubs.
ST: Selike lathola isicoco?
ND: Hatshi asikatholi sicoco
ST: Ukuze iqembu lime lenelise ukuhlala isikhathi esingaka kudinga imali, lina usizo lwemali liluthola kubani?
ND: Usizo lonke esasiludinga olwemali sancedwa nguPhilip S Gadluma. Ngifisa ukumbonga ngoba kungasuye ngabe asikho ebangeni esikilo manje njengama Digital Queens.
ST: Njengeqembu lama Digital Queens lizibona likusiphi isibanga kuminyaka emihlanu ezayo?
ND: Sizibona sesikwelinye izinga eliphakemeyo, sesisenelisa ukudlala kwamanye amazwe.
ST: Kumaqembu abesintwana aqalayo ungabanika seluleko bani?
ND: Engingabatshela khona yikuthi baqinisele bengatshiyi ukugida, azafika amalanga lapho abazabe benganxuswa khona kodwa lokhu akutsho ukuthi bayekele.
