uMthunywa
YiNtatheli kaMthunywa
UKUPHENDUKA komdlalo wenguqu ngokuqhubeka komncintiswano weChibuku Super akumelanga kwenze amaqembu ayekethise ukuhlola abadlali igcikwane leCovid-19, kutsho uKennedy Ndebele umaqhuzu wePremier Soccer League.
“Inhlanganiso yePremier Soccer League ihleli izimisele ukulandela izinqumo zokwenqabela umkhuhlane weCovid-19,” kutsho uNdebele ngoLwesithathu.
UNdebele ukhulume lokhu kulandela ukumemezelwa kombiko ovele kunhlanganiso yeSport and Recreation Commision, owokuthi umdlalo wenguqu usuvunyelwe.
Lokhu kutsho ukuba inkezo yeChibuku Super izaqhubeka kumalanga alandelayo. Imidlalo yenkezo le yandulela ukuqala kweligi yeCastle Lager Premier League. Iligi ikhangelelwe ukuthi iqalise ngenyanga kaNcwabakazi, okuzaba yisiqalo kumbali yakuleli njengoba kujwayeleke ukuthi isizini ivulwe ngenyanga kaMbimbitho.
Umqhudelwano weChibuku Super usufikise ibanga lama-Quarter Final, ngemva kokuphutsha ihlandla lamaqoqo akuqala.
“Amaqembu atshelwe ukuba aqinise ukuhlolwa kwabadlali. Lokhu kumele bakwenze phambili kwabodokotela bamaqembu lequla lezempilakahle elingaphansi kwe-PSL.
UNdebele uthe bakhangelele ukuthi amaqembu abalisa inhlelo zayo zokulolonga ngokuphangisa kwesikhathi.
Ngokutsho kukaNdebele, amaqembu kumele ahlole abadlali lezisebenzi njalonje ukuze kwenqatshelwe ukumemetheka kwegcikwane.
Isikhulumi seBulawayo Chiefs uThulani “Javas” Sibanda obike ukuba iqembu labo belilinde lilungiselele.
“Zindaba ezimnandi ukuzwa ukuba sesivunyelwe ukuthi sibuyele siyencintisa. IBulawayo Chiefs liqembu elihlala lizimisele njalo lilungiselele,” kutsho uJavas.
Iphephandaba likazulu lixhumane lomdlali weHighlanders uWinston Mango othe kuzindaba ezinhle kubo bonke eqenjini labo.
“Kuwo wonke umdlali, ukuzwa ukuthi sesibuyela enkundleni, kube ngamazwi amahle kuliviki. Silinde ukubuyela siyelolonga kodwa asikhohlwa ukuthi kumele sizivikele.”
