uMthunywa
Kule iviki iphephandaba likazulu lijonge ukujabulisa uMthwakazi ngolunye uhlangothi nanko phela liphathele uzulu ingcitshi kwezokuloba ngolimi lwesiNdebebele. Umlobi lo nguMbonisi Ndlovu ophuma khonapha koMthwakazi kalobi nje ulomuntu phansi.
BakaMthwakazi ukutshelwa yikuncitshwa ngakho othanda ukwazi ngalo umlobi wodumo, nansi ingxoxo ehlabusayo phakathi komlobi lo uMbonisi Ndlovu (MN) lentatheli yephephendaba likazulu uCornelius Luphahla (CL).
CL: Akuthi fahlafahla ngamafitshane mayelana lembali yakho kanye leyokuloba kwakho jahelidala?
MN: Mina ngazalwa mhlaka 4 Nhlolanja 1980 esibhedlela seSigodini kodwa ngidabuka eMtshabezi eGwanda. Kwathi ngomnyaka ka-1986 ngayangena uGiredi 1 eMtshabezi Primary School ngaqeda khona uGiredi 7 ngo-1992. Ngaqhubeka ngezifundo zami kwathi ngo-1993 ngayafunda uFomu 1 eDula Secondary School eMatopo. Ngasuka njalo nginguFomu 1 ngayaqhubeka ngezifundo zami eNkulumane High School koBulawayo ngaze ngayaqeda uFomu 4 kulesisikolo.
Kwathi ngo-1997 ngayasebenza koGrills koBulawayo ngaze ngayaphuma ngo-2003. Ngasuka njalo ngayasebenza NRZ ngo-2005 ngaze ngayaphuma ngo-2007. Ngemva kwalokho-ke ngaya kwele South Africa okuyikho engihlala khona lakhathesi. Ngakho-ke ezokuloba ngaziqala ngisaseleminyaka engu 14 ngibhala ingwalo kanye lezinkondlo noma nje zingazange zivezwe emphakathini.
CL: Njengomlobi akutsho jahelibanzi ukuthi sowakhipha ingwalo ezingaki njalo sowathola sicoco bani?
MN: Njengoba nje ngiqale ukuloba kumnyaka ophelileyo khathesi sengaloba ingwalo ezine. Kumnyaka ophelileyo ngikhiphe ingwalo ezintathu ngakho lonyaka sengikhiphe ugwalo olulodwa. Ingwalo engazilobayo zigoqela oluthi Nginjenje Ngenxa yakho, Yeyi kubi, Ithunzi lomufi, kanye loluphume kuyonale iviki oluthi Xola mntanami.
Lokhu ngaqala ukuloba kangikaze ngithole isicoco ngoba kangikaze ngingene emncintiswaneni yezicoco.
Ngaloku ngilethemba lokuthi mhla ngizangena emncintiswaneni lo ngizakuba yintshantshu sibili ngoba ngiyazethemba kwezokuloba.
CL: Akutsho ndodamdabuko ukuthi abantu bathini ngomsebeni wakho njalo ukhangelele ukwenzelani uzulu lonyaka?
MN: Njengomlobi abantu bayawuthakazelela umsebenzi wami wokuloba engiwenzayo njalo bangikhuthaza ukuthi ngiqhubekele phambili ngoba ingwalo zami zilemfundiso enkulu kuzulu njalo zimnandi. Ngalokhu-ke lonyaka ngikhangelele ukulobela uzulu ezinye njalo ingwalo ezimbili phezulu kwalolu esengilukhiphile lonyaka.
CL: Jaha lakithi ngaphandle kokuloba msebenzi bani owenzayo?
MN: Mina ngaphandle kokuloba ngiyasebenza khonapha eGoli njalo ngiyazisebenza. Yikho-ke engathola khona imali yokukhipha ingwalo zami ngokusemthethweni.
CL: Njengomlobi bunzima bani oyake uhlangane labo njalo nkuthazo bani oyipha abalobi abasacathula?
MN: Lokhe ngaqala ukuloba ubunzima engiyake ngihlangane labo yikuthi ngangiswela imali yokukhipha ingwalo zami yikho okwadala ukuthi ngiphuze ukuzikhipha. Okunye njalo ngangiswele ulwazi lokuthi ngingenza njani ukuze ngikhiphe ingwalo zami. Ngalokhu-ke kubalobi abasacathulayo ngithi kababambe ziqine bengadeli ukuloba kuthi labo abahlangana lobunzima babuye kimi ngibancedise ngendlela ezehlukeneyo.
